Башкалада Шәһәр көнендә ниләр көтелә?

– Уфаның барлык районнарында да без халык белән очрашабыз, мин баштан ук үзем өчен шундый бурыч куйдым. Урыннарда, ишегалларында, җәмәгать киңлеклә­рен­дә халык белән очрашып фикер алышабыз. Шулай ук подъездларга капиталь ремонт ясауның ничек баруын карыйбыз, – дип ассызыклады Рат­мир Мәүлиев, халык белән аралашу үз эшен­дә өстен­лек булуын ассызыклап.

Үз чыгышында ул уфалыларны һәм журналистларны кызыксындырган мәсьәләләргә кагылды. Аерым алганда, 12 июнь­дә Шәһәр көненә планлашты­рыл­ган төп чаралар турында мәгълүмат бирде һәм, бу көнне халыкны бик күп кызыклы чаралар көтә, дип билгеләп үтте. Бәйрәм көнендә Уфаның 450 еллыгына яңа брендбук, төп герой һәм республика башкаласы юбилеен бәйрәм итү­нең төп программасы тәкъдим ителәчәк.

Ратмир Мәүлиев, шулай ук, шәһәр территорияләрен төзек­лән­дерү һәм яшелләндерү, юл инфраструктурасын, җәмәгать транспорты челтәрен үстерү, җәяү­леләр тротуарларын ремонтлау, юбилей һәм социаль инфраструктура объектларын төзү һәм реконструкцияләү, коммуналь техника паркын яңарту турында сөйләде. Әлеге сорауларга җа­вап­ларның кайбер­ләрен сезнең игътибарга да тәкъ­дим итәбез.

– Төзелеш кыйммәт­лән­деме?
– Әлегә кыйммәтләнмәде. Әмма якын арада кайбер под­рядчыларның безгә бу тема буенча мөрәҗәгать итәчәген аң­лыйбыз. Гомумән алганда, төзе­леш тармагы катлаулы чор киче­рә. Төзелеш материал­­ларының, техниканың һәм моның белән бәйле барлык әйберләрнең бәя­се дә артты. Мәсьәлә актуаль, аны контроль­дә тотабыз.

– Уфа яшьләрнең таләп­ләренә җавап бирәме?

– Бу өлкәне тагын да җә­һәтрәк үстерергә кирәк. Өстәмә белем бирү өлешендә дә. Бу үсеп килүче буында нинди дә булса үзенчәлекле сәләтләр ачу мөмкинлеге бирә. Белем бирү үзәкләре, спорт объектлары булдыру, әйтик, көрәш үзәге, парк­лар төзү. Алар бүген төзеклән­дерелә – болар барысы да мө­һим, бу яшьләргә үсәргә, ярышларда катнашырга мөм­кинлек бирә.

– Уфадагы электр тран­спортының киләчәге нинди?
– Электр транспорты мө­һим социаль бурыч башкара. Шәһәр аның эшен оештыруда актив кат­наша. Трамвай юлла­рын үстерү дә актуаль мәсьәлә. Аны профессионаллар халык белән бергә хәл итәргә тиеш. Рельс­ларны да, хәрәкәт составын да алыштыру таләп ителә. Бу вакыт һәм зур инвес­тицияләр та-ләп итәчәк. Шуңа күрә мәсьәлә әлегә ачык кала. Без аның өс­тендә Транспорт министрлыгы белән бергә эшлибез, фокус-төркемнәр җыя­быз, профессионалларны җә­леп итәбез.

– Үзәк базар янында халык конкурсында җиңүче­нең арт-объекты урнаштырылачакмы?
– Конкурска 50гә якын эш килде. Тәкъдим ителгән барлык эшләр арасыннан ул иң яхшысы булып тора. Бу – жю­ри фикере. Ахыргы карар әле­гә кабул ител­мәгән. Хәзер әлеге проектны җентекләп өйрәнәбез, аның бәясен, техник үтәлешен карыйбыз. Әйдә­гез, карарны бергәләп кабул итик.

– Октябрь революциясе урамында променад зонасы булачакмы? Виденеевлар йортын саклап калуга ничек карыйсыз?
– Берничә көн элек анда күчмә киңәшмә уздырдык. Бе­рен­чедән, мародерлыктан саклау мәсьәләсе күтәрелде, хәзер объект сак контроле астында. Ихатасын карадык – бәдрәфләр тора, шәһәр үзәге өчен килешә торган эш түгел. Архитектура һәйкәлләрен сакларга, әмма мәдәни мирас объектлары булмаган артык корылмаларны сүтәргә, чүп-чарны җыештырыр­га кирәк. Җаваплы кешеләрне билгелибез һәм якын арада тәртип урнаштырачакбыз.
Җәяүлеләр променады проектына килгәндә, шәһәр аңа мох­таҗ. Аны нинди акчага га­мәл­гә ашыру вариантларын табарга кирәк.

– Дәүләт циркын реконст­рукцияләү проекты нинди хәлдә?
– Безнең бурыч – федера­ль финанслауны җәлеп итү, Мәдә­ният министрлыгы һәм “Росгосцирк” белән хезмәт­тәшлек итү. Без булдырырбыз дип уйлыйбыз. Конкрет даталарны атарга хәзергә иртәрәк. Бу – мөһим объект, мәсьәлә җитди конт­роль­дә.

– Кадрлар сәясәте нәр­сәгә нигезләнгән?
– Кадрлар сәясәте буенча ике критерий: профессиональлек һәм ышаныч. Бүген шәһәр­дә 80гә якын ачык вакансия бар. Килегез. Дамир Галиуллин – Уфаның бизнес-шерифы, ул республика министрлыгыннан килде. Бу аның өчен, бәлки, үзенә күрә түбәнгә төшүдер, әмма безнең өчен мэрияне көчәйтү.

– Шәһәрдә туризм ничек үсешә?
– Без заявка әзерлибез һәм тагын 250 миллион сумга ка­дәр федераль финанслауны җәлеп итү мөмкинлеге бар. Конкурска заявка башка претендентлар арасында үзенчә­леклерәк булсын өчен, профессионалларны җәлеп итә­без. Бу акча безнең “Алтын миля” проектына, тирә-юньдә­ге инфраструктурага тотынылачак. Быел шәһәргә беренче тапкыр круиз теплоходлары керде, киләсе елга Уфа кунаклары өчен тагын да киңрәк һәм күптөрлерәк программа эшләячәкбез. Шәһәрнең үз уникаль проекты – 70,25 километр озынлыктагы “Уфа муенсасы” дигән сәламәтлек сукмагы бар.

– Шәһәр бюджеты үтәле­ше белән эш ничек?
– Акча күп була алмый. Һәр­вакыт җитми. Безнең 1,5 миллиард сум тирәсе бурычыбыз да бар, ел азагында аны рефинансларга кирәк. Шәһәрдә “со­ры” хезмәт базары бик күп, ке­ше­ләргә эш хакын конвертта түлиләр һәм салымнан качалар, шуңа күрә табышларны легаль­ләштерү бик актуаль. Әмма хә­зер эшкуарларга басым ясый торган вакыт түгел. Бары тик сөйлә­шү­ләр һәм аң­латулар ысулы бе­лән генә эш итәргә мөм­кин. Шулай ук федераль финанслау чыганакларын эзләргә кирәк. Барлык чыганаклардан инвести­цияләр җәлеп итәргә. Яңа предприятиеләр булдырырга һәм гамәлдәге­ләрен үсте­рергә, IT-тармакны үстерергә яр­дәм итәргә кирәк.

– Уңайлы мохит булдыру өчен тагын нәрсә эшләргә кирәк?
– Бу – бик актуаль тема. Хәтта яңа төзекләндерү, яки төзелеш булган урыннарда да сыйфатсыз эшләргә юл куелган. Күзәтчелек органнары начар эшли. Мәсәлән, Комсомол урамы, анда җитешсезлекләр бар. Әйдәгез, бергәләп конт­рольдә тотыйк.

– Сезнең өчен “Яшисе килә торган шәһәр” гыйбарәсе нәр­сә ул?
– Шәһәр һәркем өчен үзен­чәлеккә ия булырга тиеш. Мә­сә­лән, балалар һәм аларның әти-әниләре өчен – балалар мәй­данчыклары, балалар бак­часының өйләренә якын булуы актуаль. Өлкәннәр өчен – парк зонасы янында булу. Эшкуар өчен хезмәт ресурслары, буш җир участокларының һәркем өчен мөмкин булуы мөһим. Барысы өчен дә әйтергә кыен, әмма мин халыкның барлык төркемнәре мәнфәгатьләрен исәпкә алырга тиеш. Шәһәр барлык халык өчен дә уңайлы булырга тиеш.

– Зорге урамында биек йорт төзү турында бер-ике сүз.
– Мәйданда булдым. Гаугалы төзелеш тирәсендә инде күпкатлы торак йортлар тора. Шәһәр хакимияте Русиянең Шәһәр төзелеше кодексы таләп иткән документлардан чыгып рөхсәт биргән. Мәсьәлә судта карала. Суд органнары юридик бәя бирсен һәм карар кабул ителсен.

– Коммуналь хуҗалыкта кадрлар мәсьәләсе ничек тора?
– Муниципаль бюджет учреждениесе хезмәткәрләренә хезмәт хакын арттыру буенча кабул ителгән карар үз нәтиҗә­ләрен бирә. Динамика уңай, штат акрынлап арта. Хезмәт­кәр­­ләр Мәскәүгә вахта ысулы белән кил­гән кебек, тармакны республика районнарыннан килгән кешеләр белән кө­чәйтү мөһим. Бу өлкә­дә без­гә дә активрак пропаганда алып барырга, эшче куллар җәлеп итәргә кирәк.

– Мәскәүдән кайтарылган “ЛиАЗ”лар турында фикерегез нинди?
– Бу автобусларның техник торышы төрле. Линиягә чыгару өчен техниканы яңартырга ки-рәк. Эш бара. Бүген төрле шартларга бәйле төгәл сроклар­ны билгеләү кыен, шул исәптән запас частьләр буенча да. Барлык автобусларның да килүен кө­тәргә кирәк, хәзерге вакытта аларның яртысыннан артыгы алынган инде. Аларны тиешле тәртипкә китерәбез, киләчәктә шәһәр маршрутларына чыгарачакбыз.

– Түләүле парковкалар проекты кайчан тормышка ашырылачак?
– Бу проект 80-100 миллион сумга бәяләнә. Быел муниципалитет бу карарны кабул итмә­де, чөнки алга таба икъти­сад-ның ничек үсәчәген күзалла­вы авыр. Динамикадагы ситуацияне карарга кирәк. Быел гына түгел.

* * *
Гомумән алганда, матбугат конференциясендә җанлы һәм конструктив сөйләшү булды. Мэр Ратмир Мәүлиев алга таба да киңкүләм мәгълүмат чаралары вәкилләре белән ачык форматта аралашуны дәвам итәчәген белдерде.

Фәнүз МӘХМҮТҖАНОВ әзерләде.