Юра Күмертауда туган, Зианчурада укыган...

Эстрадага һич көтелмәгән яңалык булып килеп керде дә, бик матур бер чорны иҗаты белән яктыртты ул. 49 яшендә генә бик вакытсыз үлгән Юрий Шатунов 1973 елда Башкортстанда, Күмертау шәһәрендә туган. "Башинформ" хәбәрчесе Ләйлә Аралбаева аның балачак эзләреннән узган.

Юра туганда аның әнисе Верага нибары 18 яшь була, һәм нәкъ менә аның фамилиясен гомер буе йөртә.

Күп кенә чыганакларда башка мәктәпләр күрсәтелсә дә, беренче сыйныфка булачак артист 1980 елда Зианчура районының Исәнгол авылында бара. Юраның беренче укытучысы Валентина Илюхина һәм аның сыйныфташлары аны бүген хөрмәт белән искә ала.

„Юра башлангыч сыйныфларны бездә, 2нче Исәнгол урта мәктәбендә,"Б" классында укыды. Ул беренче рәттә икенче парта артында утыра иде. Юра яхшы, җиңел укыды, "4" һәм "5"легә өлгәште. Аның хәтере бик яхшы иде, ул шигырьләрне бик тиз ятлады. Җырларга ярата, җыр смотрларында катнаша иде. Без һәрчак: „Без - кызыл кавалеристлар...“ - дип җырлый идек. Походларга, Ык елгасына бардык. Учак янында утыра, бәрәңге пешерә идек, — дип искә ала Валентина Ильинична. - Юра озын буйлы түгел, әмма нык гәүдәле, ачу сакламый, теләсә нинди шартларда авызы ерык була иде, катлаулы гаилә хәлләренә карамастан, йөзеннән елмаю китмәде ... »

Сыйныфташлары хатирәләре буенча, булачак артистның әнисе һәм үги әтисе бик хәерче яшәгәннәр, эчкәннәр. Шуңа күрә кайвакыт укытучы Юраны өенә алып кайта торган булган. Малайның әнисе 4нче сыйныфта укыганда үлә һәм Куергазы районының Савельевка авылында җирләнә.

"Кайчагында Юра берничә көн минем гаиләдә яшәде. Минем иң өлкән улымның да исеме Юра, һәм мин Юра белән өйгә кайтканда, ирем: "Икенче санлы Юрок килә!“ - дип каршы ала иде. Бергәләп дәрес әзерләделәр, ашап һәм мунча кереп кайта иде. Кайчагында аны әбисе алды. Әмма ул сугыш инвалиды булган ирен карый, оныгын да гел тәрбияли алмый иде. Юраның әнисе вафат булгач, күпмедер вакытка аны апасы үз гаиләсенә алып китте, әмма аның өч баласы бар иде. Бераздан Юраны Күмертау шәһәренең мәктәп-интернатына билгеләделәр, ә аннары Ырынбур өлкәсенә алып киттеләр», — дип дәвам итә Валентина Ильинична.

Ул вакытта Юраның беренче укытучысына нибары 24 яшь була. Аннан соң ул әле күпмедер вакыт Исәнгол мәктәбендә эшли, ә хәзер Ырынбур өлкәсенең Төлгән авылында яши. Валентина Илюхина - 45 еллык стажы булган педагог, өч бала тәрбияләп үстергән. Соңыннан артист белән аңа бер тапкыр да очрашырга туры килмәгән. Әмма ул үзенең укучысының иҗатын гомер буе күзәтеп барган.

"Исәнгол авылындагы тормышы турында аның бик авыр хатирәләре калгандыр, күрәсең, ул бу хакта беркайда да сөйләмәде, — дип билгеләп үтә Валентина Ильинична. — Мин аның иҗатын, эшләрен һәрвакыт күзәттем. Шушы көннәрдә Шатуновка җырга хокукны кайтарган суд тәмамланды".

«Без Юра Шатунов белән беренче сыйныфтан укыдык. Хәтерлим әле, үзешчән сәнгать смотры иде, без буденовкаларда маршта атлыйбыз, ә ул "Шел отряд по берегу…" дип җырлый. Дүртлегә укый иде, әмма һәрвакыт беренче дәрескә соңга калды. Беренче укытучыбыз - Валентина Ильинична: "Ниһаять, безнең Шатун килде", - дип каршы ала иде, - дип сөйли Юраның сыйныфташы Эльза Даминева. — Әле ул беренче чибәркәй һәм сыйныф отличнигы Ирина Соколовскаяга гашыйк булды. Хәтерлим, хәтта аның өчен сыйныфташыбыз Алеша Неклеенов белән сугышты. Без, балалар, ул чакта аның гаиләсе бик имин булмавын аңламый идек."

«Без күршеләр булып яшәдек, көн саен мәктәптән бергә кайта идек, — дип искә ала сыйныфташы Газиз Хөсәенов. - Аның ачык күңелле булуын хәтерлим, мәктәптә гел концертларда җырлады. Алар бик ярлы, кечкенә генә йортта яшәде. Еш кына мәктәптән соң ул безгә керә иде, бергә уйный идек».