Мәктәп тә, ФАП та - шәп!

Төбәк җитәкчесе яңартылган фельдшер-акушерлык пункты эше белән танышты. Туймазы район үзәк дәваханәсенең баш табибы Илдар Гәрәев аңлатканча, 1990 елда төзелгән бинаны "Атайсал"республика проектында катнашучылар – эшкуарлар - "РиаПласт" компаниясе җитәкчеләре, Марат һәм Ринат Шәйдуллиннар ремонтлаган.

Яңартылган ФАП беренчел медицина ярдәме күрсәтүнең барлык стандартларына туры килә. Бинаның түбәсен алмаштыралар, фасадын тышлыйлар, кабинетларны үзгәртеп планлаштыралар, сантехника һәм җылы идәннәр монтажлыйлар, территорияне төзекләндерәләр. Медпункт кирәкле җиһазлар белән комплектланган, стационар элемтәгә һәм интернетка тоташтырылган.

Радий Хәбиров ФАП мөдире Зөлфирә Гыйбадуллина белән аралашты. Ул авылда тугыз елдан артык эшләвен, быел тагын бер белгеч Регина Шакированы эшкә алуларын әйтте. Бергә фельдшерлар 1 110 кешегә хезмәт күрсәтә, шуларның 260ы - балалар. Авылдан читтә йөрү мөмкинлеге булмаган ташламалы категориядәге кешеләргә дарулар һәм медицина тәгаенләнешендәге әйберләр китерелә.

Башкортстан Башлыгы авылга эшкә килгән яшь белгечләрне күрү бик күңелле, дип билгеләп үтте.

- Без республикада авыл җирлегендә ФАПларны алмаштыру буенча планлы эш алып барабыз. Бездә алар хәтта XIX гасыр биналарында урнашкан, анда кыш көне утын мичләре ягылган. Әкренләп хәлне төзәтәбез, – диде Радий Хәбиров. - Төмәнәк ФАПында авылдашлары - Туймазы эшкуарлары капиталь ремонт ясаган. Яхшы эш эшләгәннәр. Моның өчен аларга һәм безнең «Атайсал» проектына ярдәм иткән барлык меценатларга зур рәхмәт.

Аннары Радий Хәбиров 360 урынга исәпләнгән урта белем бирү мәктәбендә булды. 2022 елда «Мәктәп киңлегендә иң яхшы санлы практикалар» Бөтенрусия конкурсы нәтиҗәләре буенча Төмәнәк авылы мәктәбе «Илнең иң яхшы санлы мәктәпләре» номинациясендә призер булды һәм Русиянең топ-6 санлы мәктәпләре исемлегенә керде.

Мәгариф учреждениесе директоры Илдар Хаматов хәбәр иткәнчә, бина 1967 елда төзелгән. 2009-10 уку елында биредә капиталь ремонт үткәрелгән һәм 288 кв. м мәйданлы спорт залы реконструкцияләнгән. Бу уку елында мәктәпкә 140тан артык бала йөри, шул исәптән Дарвин, Покровка, Тирән-Елга һәм Казнаковка авылларыннан.

Радий Хәбиров спорт залында булды. Мәктәп тренеры Руслан Миңнуллин бүген биредә укучылар арасында көрәш буенча турнир узганын сөйләде. Ярышларга Туймазы районыннан 60 көрәшче килгән.

Аннары республика җитәкчесе технология, информатика, физика кабинетларын карады. Педагоглар 2023 елның 1 сентябреннән мәктәптә «Шәйморатов» сыйныфы эшләвен, аның укучылары Русия Герое, генерал-майор Миңнегали Шәйморатов исемендәге легендар комдив кубогына җәйге уеннарда икенче урынны алуын сөйләде. Балалар шулай ук патриотик чараларда, олимпиадаларда, «Беренчеләр хәрәкәте» волонтерлык отрядлары башлангычларында актив катнаша.

Мәктәптә Башкортстан Башлыгы махсус хәрби операциядә катнашучыларның гаиләләре белән очрашты