Эшче һөнәре - безнең горурлык!

Алар - оборона һәм авиация сәнәгате, автомобиль һәм авыл хуҗалыгы машиналары төзү предприятиеләре хезмәткәрләре, шул исәптән якыннары СВО зонасында булган хатын-кызлар.
Делегатлар арасында илнең төрле төбәкләреннән - Башкортстан һәм Удмуртия, Мәскәү, Владимир, Ленинград өлкәләре вәкилләре бар. Чараны, гадәттәгечә, Ирина Исламова җитәкчелегендәге сәнәгать хезмәткәрләре профсоюзының республика оешмасы (Роспрофпром) оештырган.

"Без үз съездларыбызны хатын-кызларның көн тәртибе социаль-сәяси трендларда актив катнаша башлаганчы ук үткәрә башлаган идек, шул вакытлардан бөтен җирдә төрле хатын-кызлар конференцияләре, форумнар һәм "түгәрәк өстәл"ләр оештырабыз, - дип сөйли Башкортстанның сәнәгате профсоюзы лидеры Ирина Исламова. — Бу - хезмәт ияләренең бергә җыелырга, уртак проблемалар һәм аларны хәл итү юллары турында фикер алышырга, үз эшең, тормышың, сәламәтлегең, гаиләң өчен файдалы компетенцияләргә өйрәнүгә омтылышы. Нәкъ менә шундый даирәдә бизнес та, идарәчеләр дә, чиновниклар да түгел, ә нәкъ менә гади хезмәт ияләре, безнең сәнәгать хезмәткәрләре профсоюзы әгъзалары актив катнаша.

Төрле елларда без аларны финанс грамоталылыгына, гаилә психологиясенә, стресс белән идарә итүгә, хезмәт хокукларын яклауга, сәламәтлекне, яшьлекне һәм матурлыкны сакларга өйрәттек. Быел съездның төп ике темасы итеп хезмәт хокуклары һәм сәнәгать предприятиеләре хезмәткәрләренең сәламәтлеген алдык. Ә без, профсоюз буларак, аларның, производство функцияләрен намус белән үтәп, үзләре сәламәт булырга һәм сәламәт балалар табарга, аларда традицион кыйммәтләр тәрбияләргә, үз хезмәт хокукларын белергә һәм профсоюзга берләшеп, аларны яклый белергә кирәклеген онытмавын телибез. Торган саен күбрәк хатын-кызлар безнең съезд турында белә һәм анда катнашырга тели. Башкортстанда моны ничек эшләвебезне карарга, тәҗрибә уртаклашырга башка төбәкләрдән коллегалар да килә».

Съездда ике дискуссия мәйданчыгы оештырылды, алар "Закон. Хокук. Гарантияләр. Хатын-кызлар карашы" һәм "Профсоюз ЗА здоровье" дип аталды. Аларда Русия Бәйсез профсоюзлар федерациясе (ФНПР) рәисе урынбасары Александр Шершуков, Башкортстан Профсоюзлар федерациясе (ФПРБ) рәисе Гүзәл Мирошниченко, Русия сәнәгать хезмәткәрләре профсоюзы рәисе урынбасары Алексей Жуков, Башкортстанның Гаилә, хезмәт һәм халыкны социаль яклау министрлыгы, Дәүләт хезмәт инспекциясе вәкилләре, «Сәламәт Ватан» иҗтимагый оешмасының төбәк бүлеге җитәкчесе Наталья Кулагина катнаштылар.

Съездда фидакарь профактивисткалар да бүләкләнде. Алар, җавап итеп, үз һөнәрләре белән горурланып сөйләде. Күргәзмә-сәүдә урыннары һәм осталык дәресләре дә оештырылган иде. Моннан тыш, катнашучылар «Хатын-кызга багышлана» дигән шоу карады һәм Уфа шәһәре музейларында экскурсияләрдә булды.

Фото: rosprofprom-rb.ru