Киләсе елга эш хаклары күпме булачак?

Уфа шәһәре хакимияте республика башкаласының 2042 елга кадәрге чорга озак вакытлы бюджет фаразын раслады. Документ Уфа шәһәре хакимияте сайтында бастырылган. Фараз ике вариантта төзелгән: консерватив һәм база. Нигез итеп база варианты кабул ителгән.

Документ нигезендә Уфаның табышлы предприятиеләренең база варианты буенча табышы 2025-42 елларда 101-102,5 процент чикләрендә фаразлана. Саннарда 2042 елга табыш 384,8 миллиард сумга җитәчәк. Табышның артуы эшкәртү, төзелеш, күпләп һәм ваклап сату тармагы предприятиеләре хисабына көтелә.

Уфа икътисадында эшләүчеләр саны 2042 елга фаразның база варианты буенча 542 мең кеше тәшкил итәчәк (2023 елга карата +8,4%). Шәһәрнең эре һәм урта предприятиеләрендә база вариантында уртача айлык хезмәт хакы инде 2026 ел нәтиҗәләре буенча 100 мең сумнан артып китәчәк. 2042 елга хезмәт хакы 206,6 мең сумга җитәчәк, 2023 ел белән чагыштырганда, 2,8 тапкыр артачак.

2026 елда Уфада хезмәт хакы фонды 500 миллиард сумнан артып китәчәк. 2042 елга база варианты буенча ул 1 триллион 148 миллиард сумга җитәчәк, 2023 елга карата 3 тапкыр артачак.

Шәһәр бюджетына килгәндә, 2042 елга кадәр аның төп керем чыганаклары сакланачак. Бу - физик берәмлекләрнең керемнәренә салым, гомум керемгә һәм милеккә салымнар, дәүләт һәм муниципаль милектән файдаланудан кергән акчалар.

Озак сроклы чорда физик берәмлекләр керемнәренә салым өлешенең 2024 елда 42,4 проценттан 2042 елда база варианты буенча 52 процентка кадәр артуы көтелә. Бу чорда тулаем керемгә салым өлеше 29,7 проценттан 31,9 процентка кадәр артачак. Дәүләт милкеннән керемнәр алдагы 17 елда 9,3 проценттан 5,3 процентка кадәр кимиячәк.

2042 елда Уфаның муниципаль бурычы күләме 2025 ел дәрәҗәсендә фаразлана. Салым һәм салым булмаган бюджет керемнәрен арттыру исәбенә бурыч йөкләнешен киметү күздә тотыла.

Фото: bashinform.ru