Йортың балкып торсын, дисәң, үзең дә тырыш!

Планга ярашлы, Уфаның күпфатирлы 11 йортында су белән тәэмин итү һәм су агызу системаларына капиталь ремонт ясалачак. Ремонтның бу төренә түбәндәгеләр керә: подвалдагы торбаүткәргечләрне алмаштыру, канализация баганасының суырткыч өлешен күтәртү, эчке канализация системасын һәм суүткәргечләрне гидравлик сынаулар. Шулай ук Уфада 11 589 кеше яшәгән күпфатирлы 51 йортның түбәсен капиталь ремонтлау планлаштырылган.

Шушы һәм башка чаралар планы узган елда ук эшләнде. Аңлашыла ки, соңгы вакытта төзелеш матералларына хаклар кискен күтәрелде, алда тагын үзгәрешләр көтелә. Теге яки бу йортта капиталь ремонт эшләре шушы сәбәпле туктап калмасмы? Әлеге вәзгыятьне исәпкә алып, күп кенә йортларда фатир хуҗалары капиталь ремонт өчен взносларны үзләре теләп артыграк түли башлаган.

Мәсәлән, Русия урамы 33/2 санлы йорта яшәүчеләр дә шулай иткән. Бу хакта йорт комитеты рәисе Рөстәм Ситдыйков болай ди:
– Капиталь ремонт – ул чыгымнар гына түгел, бу — киләчәккә инвестицияләр. Проблемаларны озаграк кичектергән саен, аларны хәл итү кыйммәтрәк булачак. Минималь взносны арттыру – ул түләүләрне арттыру гына түгел, ә безнең йортларны саклап калу, аларны хәвефсез һәм яшәү өчен уңайлы итү мөмкинлеге. Минималь взнос күләмен арттыру капиталь ремонт фондын арттырырга һәм күбрәк йортларны ремонтларга мөмкинлек бирәчәк. Шуңа да без монда кадәр квадрат метр өчен түләгән 8 сум 10 тиен урынына 9 сум 60 тиен вхнос кертергә булдык.

Чынында исә, дәүләт тә Капиталь ремонт программасына ярдәм итә, әмма халыкның үз катнашлыгыннан башка проблеманы хәл итеп булмый. Взносларны арттыру мәсьәләсе – квитанциядәге саннар гына түгел, ә безнең йортларның киләчәк буыннар өчен нык һәм уңайлы булып калуы турында кайгырту.

– Иртән фатирыңнан чыгасың, ә подъездда чисталык, уңайлылык – бу инде хыял түгел, ә чынбарлык. Без йортларны планлы рәвештә тәртипкә китерәбез, – дигән иде Башкортстан Башлыгы Радий Хәбиров моннан ике ел элек. Ә 2018 елга кадәр, моннан җиде ел элек бу өлкәдәге вәзгыятьне бик искә төшерәсе дә килми. Соңгы еларда йортларны капиталь ремонтлау, видеокүзәтү камералары кую анда яшәүче республика халкы тормышын күпкә яхшыртты.

Йортларны капиталь ремонтлау программасы авылларда, район үзәкләрендә дә уңышлы эшли. Ярмәкәй районы хакимияте башлыгының төзелеш буенча урынбасары Равил Арсланов әйтүенчә, районда күпфатирлы 42йортның түбәсе шифер белән ябылган булган. Соңгы елларда бу юнәлештәге эшчәнлекнең нәтиҗәлелеге аркасында хәзер җидесе генә калган. Якын киләчәктә алары да төзекләндереләчәк. Былтыр 8 Март авылының Төзелеш урамындагы 10нчы һәм Спартак авылының Сергей Стариков урамындагы 9нчы йортларның түбәсе алмаштырылган.

Халыкның актив позициясе һәм хезмәт күрсәтүче оешманың җайга салынган эше нәтиҗәсендә биредәге йортлар һәм йорт яны территорияләре яшәү өчен уңайлырак була бара. Үткән елда Ярмәкәй авылы, Грачев урамы, 5 адресы буенча урнашкан күпфатирлы йорт. «Күпфатирлы йортларны карап-тоту һәм йорт яны территорияләрен төзекләндерү буенча иң яхшы объект» республика конкурсында җиңеп, «Авыл җирлегенең иң яхшы күпфатирлы йорты» номинациясендә 750 мең сум акча откан. Акчалар әлеге күпфатирлы йортның торак шартларын яхшыртуга юнәлтеләчәк.

Димәк, йорт һәм аның янындагы территорияне чиста һәм уңайлы итү анда яшәүчеләрнең битараф булмавына, уңай үзгәрешләргә актив кушылуына да бәйле.

Фото: Энҗе Шәфыйкова.