УДНТУ – Русиянең техник белем бирү флагманы

Уфа дәүләт нефть техник университеты (УДНТУ) – Русиянең алдынгы техник вузларының берсе, фәнни-мәгариф үзәге буларак дөнья күләмендә танылган уку йорты. 77 ел эчендә университет 125 меңнән артык белгеч әзерләгән. Алар бүгенге көндә нефть-газ, химия, машиналар эшләү, төзелеш һәм башка тармакларда хезмәт сала. УДНТУ тәмамлаучылар Русиянең һәм чит илләрнең иң эре энергетика компанияләрендә эшли, фәнни ачышлар ясый, дәүләт идарәсендә югары вазыйфалар били. Фәнни учреждениедәге инновацион эшләнмәләр дә югары уку йортын еракларга таныта. Бораулау өчен “акыллы” сыекча – шуларның берсе.

Башкортстан Башлыгы Радий Хәбиров ассызыклавынча, Уфа дәүләт нефть техник университе-ты – республиканың горурлыгы, аның бренды һәм визит карточкасы. Вуз Русиянең терәк югары уку йорты булып тора һәм “Роснефть”, “Газпром нефть”, “СИБУР”, “Лукойл”, “Транснефть” кебек эре ком­панияләр белән тыгыз хезмәттәшлек итә.

Бүгенге көндә УДНТУда 23 меңнән артык студент белем ала, аларның 2000гә якыны – чит ил гражданнары. Биредә 300дән артык белем бирү программасы гамәлгә ашырыла: бакалавриат, магистратура, аспирантура һәм өстәмә белем бирү юнәлешләре. Университет “Приоритет-2030” һәм “Фән һәм университетлар” кебек федераль һәм гомумдәүләт программаларында да актив катнаша.

Халыкара эшчәнлек: дөнья студентларын берләштерә
УДНТУның төп эшчәнлеге юнәлешләренең берсе – халыкара хезмәттәшлек. Вузда 50дән артык илдән студентлар укый, һәр унынчы студент – чит ил вәкиле.
Белем бирүнең югары дәрәҗәсе һәм заманча технологияләр УДНТУга чит илләр студентларын да күпләп җәлеп итә. Университет нефть-газ эше, химия инженериясе, мехатроника, ясалма интеллект, энергетика һәм автоматлаштыру кебек юнәлешләрдә инглиз телендә белем алу мөмкинлеген тәкъдим итә.

Чит ил студентлары өчен уңайлы шартлар тудырылган: уку корпуслары янында урнашкан тулай тораклар, урыс теле буенча махсус әзерлек курслары, волонтерлык хезмәтен үз эченә алган адаптация системасы. Югары уку йорты белем биреп кенә калмый, студентларга мәдәни мохиткә чумарга, фәнни һәм спорт чараларында катнашырга шартлар тудыра һәм мөмкинлекләр бирә.

УДНТУ тәмамлаучыларның эшкә урнашу дәрә­җәсе бик югары. Күп кенә студентлар инде уку вакытында ук эре нефть-газ компанияләренә эшкә урнашып, яхшы хезмәт хакы ала.

Фәнни ачышлар: “акыллы” эшләнмәләр
Уфа дәүләт нефть техник университетының фәнни эшчәнлеге киңкырлы, ул нефть химиясеннән башлап экологиягә кадәр күп юнәлешләрне үз эченә ала. Университет нефть-газ тармагын үстерүдә мөһим роль уйный, заманча технологияләр булдыра.

Шундый уникаль проектларның берсе – бораулау өчен “акыллы” сыекча. Ул бораулау эшләренең нәтиҗәлелеген күтәрә һәм тирә-як мохиткә тискәре йогынтыны киметә.

Бу инновациянең өстенлекләре:

• нефть-газ катламнарын сакчыл ача, аларны пычратмый;
• тау токымының җимерелүен булдырмый, зарарлы химик реакцияләрне блоклый;
• тау токымындагы табигый каналларны саклый, скважинаның нәтиҗәлелеген арттыра;
• экологик яктан чиста, токсик кушылмаларны үз эченә алмый.

– Минем эш бораулау өчен махсус “акыллы” сыекча булдыруга багышланды, ул нефть яисә газ катламнарын чүплә­мичә, аларны саклык белән ачарга ярдәм итә, токымга таркалырга юл куймый, зарарлы химик реакцияләрне блоклый һәм токымда табигый “канал”ларны саклый. Нәтиҗәдә, скважина яхшырак эшли, ә без табигатькә азрак зыян салабыз, – ди УДНТУ Тау-нефть факультетының “Нефть һәм газ скважиналарын бораулау” кафедрасы өлкән укытучысы, техник фәннәр кандидаты Гөлназ Гаймалетдинова.

Уфа дәүләт нефть техник университеты галимнәре фәнни эшләнмәләрне тормышка ашыруда актив катнаша. Мәсәлән, Кара диңгездәге нефть һәм газ скважиналарын бораулау проектында нәкъ УДНТУ галимнәренең “акыллы” эшләнмәләре кулланыла.

Бу проект вузның Инжиниринг үзәге һәм “Нефть һәм газ скважиналарын бораулау” кафедрасы тарафыннан гамәлгә ашырыла. УДНТУ галимнәре бораулау сыекчаларының рецептурын эшләде һәм аларны диңгез платформасына китерде.

Киләчәккә караш: үсеш дәвам итә
Бүген УДНТУ – илебезнең алдынгы нефть-газ университетларының берсе. Ул югары белем бирү генә чикләнми, ә фән һәм сәнәгать өчен мөһим ачышлар да ясый.
Зур компанияләр белән хезмәттәшлек, халыкара проектларда катнашу, фәнни эшчәнлекне үстерү университетны Русиядәге иң дәрәҗәле техник вузларның берсе итә.

Алда Уфа дәүләт нефть техник университетын тагын да зуррак казанышлар, яңа ачышлар һәм халыкара танылу көтә, дип ышанабыз!