Һинд егетен Белорет кызы гашыйк итте

Уфага зур Джайпур шәһәреннән — Һиндстанның Раджастхан штаты башкаласыннан килгәндә егеткә 18 яшь була, анда ул гомуми белем бирү мәктәбендә укый. Ул безнең республика башкаласына очраклы гына эләкмәвен әйтте:

- Русиягә китәргә миңа әти-әни тәкъдим итте. Ә Уфа медицина университетын без аны дөньяда укыту сыйфаты буенча иң яхшыларның берсе дип санаганлыктан сайладык.

Шул ук вакытта, Тоуфик сүзләренчә, Русиядә югары белем алу Һиндстандагыга караганда күпкә арзанрак, шуңа күрә аның күп кенә якташлары монда укырга килә.

- Икенче курста мин Полина исемле бер кызны очраттым һәм яраттым. Озакламый ул минем хатыным булды. Без бергә "Дәвалау эше" факультетында укыдык, табиб булырга әзерләндек. Дипломнар алганчы, бер-беребезгә ярдәмләшеп, кулга-кул тотышып укыдык, - дип, тәүфыйклы гына сөйли Тоуфик.

Һиндстанда Русиядә белем алу турындагы дипломны расларга кирәк. Шуңа күрә БДМУны тәмамлаганнан соң яшь табибка өстәмә имтиханнар тапшырырга кирәк була. Квалификация расланганнан соң гына яшь белгечләр Полинаның туган шәһәре Белоретка эшкә килергә карар кылган.

- Миңа монда бик ошый! - дип уртаклаша табиб. - Белоретны зур мегаполислар белән чагыштырсак, монда тыныч, беркая да ашыгырга кирәкми. Урамнар тулы автомобильләр юк. Тирә якта - тынлык, урман һәм таулар. Мин мондагы табигать матурлыгына хәйран калам. Ул гаҗәеп! Гаҗәп, ләкин миңа мондагы климат ошый, гәрчә кыш көннәрендә монда шактый салкын. Һиндстанда мондый матурлык юк. Русиягә килгәнче минем беркайчан да кар күргәнем юк иде. Бездә һәрвакыт я эссе җәй, я яңгырлар ява.

Аның хатыны Полина Валерьевна, елмаеп, иренең башта безнең җылы кышкы киемнәребезгә ияләшә алмавын искә төшерә. Хәзер ире моның кирәклеген аңлаган.

- Мин монда искиткеч коллегаларымнан күп нәрсәгә өйрәнәм. Мәсәлән, шәфкать туташы Динә Таһирова. Ул мине һөнәргә өйрәтеп кенә калмый, урындагы халыкның менталитетын да аңлата, - дип зур хөрмәт белән сөйли табиб остазы һәм ярдәмчесе турында.

- Мин Русиядә үсеш ала алырмын дип өметләнәм, без монда яшәячәкбез. Әти-әни болай каршы түгел, шулай да минем еракка китүемә борчылалар. Алар мине бик сагына, - ди Тоуфик, моңсу елмаеп.

Бүген Башкортстанда берничә меңнән артык һинд кешесе яши. Берәүләр безгә сыйфатлы югары белем алырга килә. Ел саен йөздән артык чит ил студенты, Башкортстан вузларын тәмамлап, гражданлык ала һәм Русия медицинасында эшли башлый. Аларның кайберләре үз бизнесын үстерә. Әмма барлык яшь белгечләр дә билгеләп үткәнчә, күпмилләтле һәм кунакчыл республикада алар өчен бик уңайлы социаль мохит булдырылган.

Фото: belrab.ru