Яңа ел бәйрәмнәре хәвефсез үтте

Башкортстанда Яңа ел бәйрәмнәре коммуналь инфраструктурада зур аварияләрсез узды. Хөкүмәт утырышында Премьер-министр Андрей Назаров муниципалитетларга юлларны, ихаталарны һәм күпфатирлы йортларның түбәләрен вакытында чистарту, коммуналь челтәрләрдәге өзеклекләрне оператив бетерү кирәклеген искәртте.

Узган елның 31 декабреннән 2026 елның 11 гыйнварына кадәр 65 инцидент теркәлгән, аларның күпчелеге электр белән тәэмин итү өзеклекләренә туры килгән. Дежурда тәүлек саен 233 бригада (1165 кеше, 364 техника) эшләгән. Бәйрәмнәрдә 224 мең кубометр кар чыгарылган, 32 мең тонна бозга каршы материал кулланылган. Министр Ирина Голованова белдерүенчә, “Яңа ел каникуллары гадәттән тыш хәлләрсез узды”.

Шулай ук каты көнкүреш калдыклары чыгару системасы да бәйрәмнәргә әзер булган. Каникул чорында 30,8 мең тонна чүп чыгарылган (былтыргыдан 3 мең тоннага күбрәк). Эшләргә 357 махсус техника җәлеп ителгән. Экология министры Нияз Фазылов әйтүенчә, оператив мониторинг нәтиҗәсендә чыгару тоткарлыклары 40 процентка кимегән, ә халык мөрәҗәгатьләре 272дән 160ка төшкән. “РЭО-Радар” системасына да республикадан нибары 3 шикаять кергән, һәм алар 4 сәгать эчендә хәл ителгән.

Утырыш ахырында Андрей Назаров муниципалитетларга комплекслы тәртиптә территорияләрне чистартуны һәм инфраструктура әзерлеген ныгытуны йөкләде.

Фото: башинформ.рф