12 айда – 12 юнәлеш

Кайчак сәяхәт итәр өчен чит илләрне, ерак төбәкләрне эзлибез. Ә бит күңелле ял, табигать могҗизасы һәм көчле хис-тойгылар янәшәбездә – Башкортстанда! Таулар, мәгарәләр, елгалар, тарлавыклар – болар барысы да ел әйләнәсенә үзенә чакырып тора.

“Кайда сәяхәт итәргә?” рубрикасы кысаларында укучыларыбызга бүген Башкортстан буйлап сәяхәт календарен тәкъдим итәбез: һәр айга – аерым юнәлеш, аерым халәт.

Гыйнвар – “Инҗәр тешләре” (Ирәкташ) (Белорет районы)

Кыш уртасында “Инҗәр тешләре” кар астында аеруча мәһабәт күренә: үткен кыялар, тар сукмаклар, салкын һава. Бу урын җәяүлеләр, фотосәяхәтчеләр өчен аеруча кызыклы булачак.

Гыйнварда монда искиткеч тынлык хөкем сөрә – табигать белән ялгызың гына калу мөмкинлеге туа.

Февраль – Аскын (Гафури районы) һәм Лаклы (Салават районы) мәгарәләре

Бу ай – кар һәм боз патшалыгы вакыты. Аскын мәгарәсе – Көньяк Уралдагы иң зур боз мәйданына ия булган табигый һәйкәл, Бөтенрусия әһәмиятенә ия. Мондагы боз сталагмитлары, “мәгарә җыры” туристларны таң калдыра.

Лаклы мәгарәсе исә җиңел керү юлы һәм кызыклы формалары белән билгеле.

Март – Кече Ямантау (Белорет районы)

Кыш белән яз очрашкан чак. Кече Ямантау – кырыс, әмма матур. Биеклектән ачылган офыклар, чиста һава һәм тынлык март сәяхәтенә үзенчәлекле төсмер бирә. Бу юнәлеш күбрәк тәҗрибәле туристларга туры килә.

Апрель – Гаделша (Баймак), Күк-Караук (Ишембай), Атыш (Белорет) шарлавыклары

Язгы ташкыннар чоры. Апрельдә Башкортстан шарлавыклары аеруча көчле һәм матур. Кар сулары белән туенган Гаделша, Күк-Караук һәм Атыш шарлавыклары табигатьнең уяну билгесе.

Бу вакытта юллар эрү булырга мөмкин, ләкин бу шарлавыкларны күрер өчен генә булса да ул юлларны үтәргә була.

Май – Карамарантау сырты (Сарыкташ районы, Ырынбур өлкәсе) һәм Старичный (Лимоновский) кыясы (Салават районы)

Табигать яшелләнә, һава җылына. Май – җәяүле маршрутлар өчен иң уңайлы чор.

Әлеге кыяларның урманлы сукмаклары, киң офыклары сәяхәтчеләрне үзенә тарта.

Июнь – Айгир (Белорет районы) һәм Әй елгасы

Җәй башы – актив ял вакыты. Айгир кыялары киң панорамалар ача, көчле хис-тойгылар һәм азатлык хисе уята. Ә Әй елгасы буйлап йөзеп төшү үзе бер маҗарага әверелә: су тавышы, учак исе, кичке тынлык.

Июнь – дуслар, гаилә белән бергә сәяхәткә чыгу өчен аеруча уңайлы ай.

Июль – Шүлгәнташ (Бөрҗән районы) һәм Йомагуҗа сусаклагычы (Күгәрчен, Мәләвез һәм Бөрҗән районнары чикләрендә)

Мәгарә диварларындагы борынгы рәсемнәр, гасырлар төпкеленнән бирле сакланып калган тамгалар кешене уйланырга мәҗбүр итә.

Ә сусаклагыч ярында ял итү, вакыт уздыру җәйге эссене җиңеләйтә. Бу айда сәяхәт тынычлык белән тарихны берләштерә.

Август – Морадым тарлавыгы (Күгәрчен районы) һәм Крака сырты (Белорет районы)

Җәй ахыры – иң матур вакытларның берсе. Тарлавыклар, тау сукмаклары, киң офыклар – болар барысы да юлчыга үзен табигатьнең бер өлеше итеп тоярга ярдәм итә.

Сентябрь – Ирәмәл (Белорет районы)

Көз башы. Сентябрьдә тау битләре сары, кызгылт төсләргә күмелә. Ирәмәлгә күтәрелү физик каршылык кына түгел, ә эчке халәтеңә сәяхәт тә. Монда кеше ашыкмый, уйлана, тынлыкта үзен тыңлый.

Октябрь – Ялангач һәм Малиновая таулары (Белорет районы)

Көз уртасы – серле вакыт. Томанлы иртәләр, коелган яфраклы сукмаклар, салкын һава сәяхәткә үзгә бер моң өсти. Бу ай – фотосәяхәтләр өчен иң күркәм һәм уңайлы вакыт

Ноябрь – Шиханнар (Ишембай районы)

Ноябрьдә кар әле ятмаган, юллар ачык. Бу вакытта Торатау, Юрактау, Куштау шиханнары аеруча ачык күренә, алар формалары белән уйный кебек. Табигать кышка әзерләнә, ә кеше елга йомгак ясый.

Декабрь – Яндыкның зәңгәр кыялары (Белорет районы)

Ел ахыры – тынлык һәм уйлану вакыты. Зәңгәрсу ташлар, салкын һава, ак кар декабрь сәяхәтен тыныч, хәтта бераз фәлсәфи итә. Бу айда юлга чыгу ел дәвамында үткән юлны барлау кебек булачак.

Сәяхәт – ул ерак аралар гына түгел, ә үз төбәгеңне яңадан танып белү. Башкортстанда һәр ай аерым халәт бүләк итәргә сәләтле. Иң мөһиме – юлга чыгарга батырчылык итү. Калганын табигать үзе күрсәтә.