+24 °С
Болытлы
Гәзиткә язылуVKOKTelegram
Барлык яңалыклар
Авыл хуҗалыгы
20 ноябрь 2014, 21:51

Уңган кешенең хуҗалыгы да ныклы

Төмәнәк авылы биләмәсенең Әгертамак бистәсендә яңа урамнар калкып чыкты.— Хәзер авыл кешесе дә бөтен коммуналь уңайлыклар белән файдаланырга тиеш, — диде юлдашым, биләмә хакимияте башлыгы Әгъзам Фатыйхов. — Әгертамак урамнарындагы юлларны төзекләндерү, кышкы чорда кардан тазарту безгә йөкләтелгән. Тик муниципаль берәмлекнең махсус техникасы юк. Аның каравы, шушы авылда шәхси тракторлары булган йорт хуҗалары арасында безнең ышанычлы ярдәмчеләребез бар. Шуңа да мин сезне авылда матур дөнья көтүче, яшәгән төяген төзекләндерүгә үз өлешен кертүче Рузил Ибәтуллин белән таныштырырга телим. без аны авыл Советының штаттан тыш хезмәткәре дип тә йөртәбез. Кышын юлларны чистартып торган өчен халык аңа бик тә рәхмәтле. Ибәтуллиннар шәхси хуҗалыкларын үстерүдә дә авылдашларына яхшы үрнәк күрсәтә.

Йорт хуҗасы ачык күңелле кеше булып чыкты.
— Элгәре колхоз эшендә йөрдем, фермада атлар карадым, — дип искә ал­ды ул. — Күмәк хуҗалык таркалгач, хатыным белән якындагы Туймазы шәһә­ренә эшкә чыгып киттек. Анда янгын сүн­дерү отрядында хезмәт иттем, бер пред­приятие­дә тракторчы булып та эшләдем. Аннан инде күмәртәләп сәүдә итү базасына каравылчы булып эшкә кердем. Андагы эш графигы минем өчен бик уңайлы. Бер көн вахтада булганнан соң, шәхси хуҗалыкта эшләргә, мал-туарны карарга вакытым күп кала.
Венера һәм Рузил Ибәтулин­нар үз хуҗалыгын үстерүгә 7-8 ел элек ныклап тотынган. Быел хуҗабикә ике сыер сауган, киләсе елда аларны арттырырга исәп тоталар.
— Сөт продукциясен хәзер­ләү­челәргә тапшырмыйбыз, — ди йорт хуҗасы. — Белгән кеше­ләр өйгә килеп тә ала, үзебез дә илтеп бирәбез. Шәһәрнең бер бистә­сенә әйләнә баручы Әгер­та­макта мал-туар асраучы хуҗа­лыклар азайды. Безнең урамда да сирәгәйде алар.
Шулай да Ибәтуллиннар төп керемне ит җитештереп сатудан ала торгандыр. Гаилә башлыгы телгә алуынча, алар ел саен сугымга 4-5 баш яшь мал симертә.
— Яз үгез бозауларны сатып та алгалыйбыз, — ди ул. — Без яшь малларны көтүгә чыгармыйбыз, абзарда тотабыз. Шуңа сыйлы азыкны ел да мул хәзерли­без. Үзебезнең бакчада мал чөгендере үстерергә дә иренмибез. Симерткәндә малга фуражны да күп ашатырга кирәк. Көзен 3-4 тонна арпа кайтарып куям, азык ваклагыч машина бар. Әле дүрт үгез симертәбез. Кышкы айларда өч башын тотынырбыз, дип торабыз. Алдан әйтеп куйган кешеләргә итнең килограммын 220 сум белән биреп җибәрәбез. Югары конди­циягә җиткерелгән бер үгездән безнең кесәгә 50 мең сумнан артыграк акча керә.
Ишле мал асрау, үзләре җитеш­тергән продукцияне сату гаиләнең җитеш тормышын тәэмин итә дә инде. Ибәтул­линнарның өлкән кызлары Илмира Әлмәттәге югары уку йортының түләүле бүлегендә укый икән. Моның өчен институт кассасына ел саен тиешле сумманы кертеп барырга кирәк. Аның энесе Рөстәм бүген авыл мәктәбенең 6нчы сыйныфында белем ала. Кул арасына кергән малай, әтисеннән күреп һәм өйрәнеп, крестьян хезмәтенең тәмен татып үсә.
— Менә юлларны чистартырга 45 мең сумга яңа кар эттергеч алып кайттым, — ди Рузил Фәнис улы. — Кышка минем техника әзер, дип әйтергә була. Авыл Советы шундый эшләргә мине җәлеп итә бит. Кышын биш авылдагы урамнарны тазартырга туры килә. Килешү буенча эшлә­гәч, үземә дә файдасы ярап кала, чөнки ягулык-майлау материалларын, запас частьләрен дә алырга кирәк.
Кырыс базар мөнәсәбәтләре­ шартларында үзләрен ышанычлы тоючы Ибәтулиннар бүген хуҗалыкларын арытаба киңәйтү нияте белән яши. “Әнә, аръяк урамдагы Шәяхмәтовлар шәхси ихаталарындагы сыер малын 10 башка җиткергән. Безгә алар матур үрнәк күрсәтә. Шуңа без дә маллар санын ишәй­тү, ит-сөт продукциясен күбрәк җитештерү турында планнар корабыз,” — ди булдыклылыгы белән авыл­дашларының ихтирамын яулаган Рузил Фәнис улы.
Читайте нас: