-22 °С
Болытлы
Гәзиткә язылуVKOKTikTokINSTAGRAM
Барлык яңалыклар
Авыл хуҗалыгы
4 декабрь 2014, 21:51

Сыерлар “өй туйлый”

Краснокама районында өч елда ун терлекчелек бинасы төзекләндерелгән.Бүген аларның барысы да иркен, киң, якты, уңайлы булуы белән аерылып тора. Биредә заманча җиһазлар куелган, алар, әлбәттә, эшне җиңеләйтеп кенә калмый, күрсәткечләрне дә яхшырта. “Алга” токымчылык заводының Кирәмәт фермасына җәйге лагерьлардан кайткан маллар “өй туйлады“. Биредә аларны тулысынча яңартылган биналар каршы алды.

Фермада ремонт июльдә генә башлануга кара­мастан, күләмле эш башкарылган: түбә алмаш­тырылган, җилләтү шахталары урнаштырылган, пластик тәрәзәләр куелган, идән җәелгән, азык “өстәлләре”, сөтүткәргеч, су җылыткычлар урнаштырылган, электр һәм су челтәрләре тулысынча алмаштырылган, хезмәткәрләр өчен душ һәм ял бүлмәләре булдырылган.
— Мондый шартларда начар эшләү — оят. Хәзер фермаларда чиста, якты — туфли белән йөреп була. Малларга да “Бездән — шартлар, сездән — сөт!” дип, сыртларыннан сыйпап кына торабыз, — дип шаярта савучылар. — Алар өчен дә яхшы шартлар зур әһәмияткә ия, яңартылган биналарда малкайларның сөте күзгә күренеп арта.
— Белгечләр соңгы җиһазларны урнаштыра. Ферма, чыннан да, танымаслык булып үзгәрде, бөтен нәрсә автоматлаштырылган. Элекке фермалар тарихта торып калды. Иң мөһиме — мондый шартларда сөт җитештерү 1,5 тапкыр арта, — ди Кирәмәт фермасы мөдире Олег Айдимиров.
“Алга” токымчылык заводы, республикада берен­челәрдән булып “500 ферма” программасына кереп, башкаларны да артыннан ияртте. Бүген районның 8 хуҗалыгы, әлеге программада катнашып, хезмәткәрләр һәм маллар өчен тудырылган яхшы шартларда эшләүнең никадәр нәтиҗәле булуын күрсәтте.