-15 °С
Болытлы
Гәзиткә язылуVKOKTikTokINSTAGRAM
Барлык яңалыклар
Авыл хуҗалыгы
27 гыйнвар 2015, 23:45

Хәрәкәт бар җирдә үсеш бар!

Федоровка районында узган елга йомгак ясадылар.Узган җомгада Федоровка районында ел нәтиҗәләре буенча хезмәт алдынгыларын хөрмәтләү тантанасы үтте. Чарада республика Башлыгы Хакимиятеннән Руслан Насретдинов, Дәүләт җыелышы-Корылтай депутаты, Бюджет, салым, инвестиция сәясәте һәм территорияләр үсеше буенча комитет рәисе Рузалия Хисмәтуллина, авыл хуҗалыгы министры урынбасары Раил Авзалов, башка җитәкчеләр һәм кунаклар катнашты. Төп доклад белән район хакимияте башлыгы Радик Ишмөхәммәтов чыгыш ясады һәм ел нәтиҗәләрен җиткерде, агымдагы хуҗалык елына тәгаен бурычлар билгеләде.

Докладта яңгыратылуынча, былтыр Федоровка районында 3 миллиард 102 миллион сумлык тулай продукция җитештерелгән. Бу 2013 елга карата 105 процент тәшкил итә. Шуның 2 миллиард 16 миллион сумы аграр тармакка туры килә. Бу җәһәттән райондагы барлык 22 авыл хуҗалыгы предприятиесе дә былтыр табышлы эшләгән.
Үсемлекчелек тармагына килгәндә, җәмгысы 76,5 мең тонна бөртеклеләр уңышы җыеп алынган. Уртача уңыш гектарыннан 15,8 центнер тәшкил иткән. Бу җәһәттән Радик Гыйльметдин улы аеруча “Азат”, Фрунзе исемендәге, “Нива” хуҗалыкларының югары эш күрсәткечләрен мактап телгә алды. “Маяк”, “Агросервис”, “Заветы Ильича” һәм “Гавриловка” хуҗалыклары да күрсәткеч­ләрен сизелерлек яхшырткан.
Терлекчелек тармагында да продукция җитештерүне арттыруга ирешкәннәр. Авыл хуҗалыгы предприятиеләрендә 8803 тонна сөт (2013 елга карата 104,9 процент) һәм 1275 тонна ит (103,4 процент) җитештереп сәүдәгә чы­гарылган. Биредә дә тәү чиратта Фрунзе исемендәге, “Гавриловка”, “Азат”, “Нива”, “Искра” хуҗалыклары әйдәп бара. Шуны да билгеләп үтәргә кирәк: узган елда районда 16 савучы дүрт мең килограмм, 4 савучы биш мең килограмм үрен үткән.