-14 °С
Болытлы
Гәзиткә язылуVKOKTikTokINSTAGRAM
Барлык яңалыклар
Авыл хуҗалыгы
4 март 2015, 21:45

Яңартылган ферма табышлы эшли

Балтач районы хуҗалыкларында фермаларның тиешле дәрәҗәдә ремонтланган, сыйфатлы мал азыгының җитәрлек күләмдә туп­ланган булуы продукция җитештерүдә югалтуларга юл куймый эшләү мөмкинлеге бирә. Нәтиҗәдә, район терлекчеләре көн саен 22 тоннадан артык сөт җитештереп, шуның 19 тоннасын кулланучыларга озата. Бер сыерга уртача савым — 8,5 килограмм.

Районда терлекчелек объектларын заман таләпләренә яраклаштыруга игътибар зур. Бу җәһәттән балтачлылар республикада кабул ителгән “500 ферма” программасы мөмкин­лекләреннән нәтиҗәле файдалана. Узган елда өч фермада зур реконструкция эш­ләре башкарылды, быелга тагын икесенә документлар әзерләнгән һәм программада катнашучылар санының артуы күз­аллана.
“Рассвет” җәмгыятендә хуҗалыкның төп акча керемен тәэмин итүче терлекчелек тармагына яңа сулыш бирелде. Ферма мөдире Мисхәт Әхмәт­җанов әйтүенчә, узган елда алар, “500 ферма” программасы кысаларында, сөтчелек фермасында зур реконструкция эшләре башкарганнар. Аның барышында фер­маның түбәсе яңартылган. Ул яктылык төшә торган һәм бина эчендә микроклиматны көй­ләүче материалдан эшләнгән. Хәзер маллар яткан урын да, элекке кебек, ел саен алыштыруны таләп иткән такта идән түгел, махсус келәмнәр җәел­гән. Ремонт барышында эш шартларын җиңеләйтү һәм җитештерелгән продукциянең сыйфатын күтәрү, малларга төрле витаминнар белән баетылган азык ашату мәсь­ә­ләләре дә игътибар үзәгеннән читтә калмаган. Фермада сөтүткәргеч, суыткыч урнаштырылган. Соңгысын җәйләүгә дә алып куйганнар, нәтиҗәдә, эшкәртүчеләргә тәкъдим ите­лүче продукция ел әй­ләнәсенә беренче сорттан түбән төшми. Хәзер мал азыгы әзерләү дә миксер ярдәмендә башкарыла һәм ул төрле макро- һәм микроэлементларны куллану мөмкинлеге бирә. Терлекләрне өстәмә тукландыру оештырыл­ган.
Бер үк вакытта токымлы терлек булдыруга да игътибар бирелә — узган елда 30 баш токымлы тана алганнар. Үзләрендә дә мул продукция бирергә сәләтле сыерлар үстерергә тырышалар. Техник- орлыкландыручы Рәзилә Мир­һаҗева әйтүенчә, хәзер малларны тулысынча ясалма орлыкландыруга күчкәннәр.
Һәр эштә уңыш нигезе — әлбәттә, кешеләр. Җәмгыять директоры Фидарит Мирхазов әйтүенчә, коллективта уңган, тырыш терлекчеләр эшли. Савучылар Илфиза Нисафетдинова, Эльвира Такиуллина, Әлфирә Галәветдинова, Валентина Яндубаева, мал караучылар Сәгыйть Мирһаҗев, Рамил Фатыйхов, Финас Нисафетдинов, Илдар Шәмсет­динов, бозау караучы Рәмзия Йосыпова нәкъ шундыйлардан.
Җәмгыятьтә фермада үткәрелгән реконструкциянең уңай йогынтысын тоярга өл­гергәннәр дә инде. Җи­тештерелгән продукциянең күләме арту һәм сыйфаты югары булу, табышлы эшләп, җәмгыять кассасын тулыландыру мөмкинлеген киңәйткән.