Ә күңел – басуда!

Район игенчеләре быелгы уңышка нигезне былтыр көз үк салып калдырган иде. Барлыгы 6200 гектар туңга сөрелеп, шуның 4500 гектарына уҗым куль­туралары чәчелде. Шуңа өстәп, язгы чәчү 17 мең гектардан артык мәйданда үткә­реләчәк. Ведомствоара хезмәт­ләрнең үзара эшчәнле­ген көйләү һәм хуҗалыкларга язгы кыр эшләренә әзерлек чорында гамәли ярдәм күрсәтү өчен район хакимияте башлыгы Илдар Гарифуллин бо­е­рыгы белән махсус штаб булдырылган. Аны Илдар Вил улының урынбасары, авыл хуҗалыгы бүлеге начальнигы Нәфис Гәрәев җитәкли.
— Көздән бөртеклеләрнең 2400 тонна орлыгын хәзерләп куйган идек, — ди Нәфис Фәнис улы. — Илеш райо­нындагы күпьеллык ышанычлы партнерларыбыздан 240 тонна элита орлык кайтарттык. Аларны химикатлар белән оешкан төстә шулай ук даими партнерыбыз — “Башкортстан пестицидлары” компаниясе белгечләре эшкәртәчәк. Әлеге вакытта хуҗалыкларда техника һәм инвентарь ремонтлыйлар, бу эш тә графикка ярашлы алып барыла.
Бүлек начальнигы сөйләгән­чә, районда ремонт чорында 2 миллион сумлык авыл хуҗа­лыгы техникасы һәм инвентаре сатып алынган, ә үткән елда бу максатка хуҗалыклар 18,8 миллион сум тотынган. И. Хәй­дәров, С. Хәй­латыйпов крестьян-фермер хуҗа­лык­лары, “Нур+Р”, “Әртәкүл” җәм­гыятьләре ул техниканы 3-5 миллион сумлык алганнар.
Генеральный директоры Ренат Әскаров булган “Нур+Р” җәмгыятенә без Яугилде авылына Уфага кайтышлый сугылдык. Районда яхшы гына күр­сәткечләре белән билгеле җавап­лылыгы чикләнгән бу җәмгыятьне бүген Альмира Әлтдинова җитәкли. Үз иң­нәренә шундый зур җавап­лылык алган бу гүзәл затка сокланмый мөмкин түгел.
— Бүгенгә ремонт тәмам­ланып килә, — диде ул. — Бу эштә меха­низаторларым Ди­нар Әхмәров, Зөлфәт Сафаров, Рамил Камалов, Руслан Гәрәев, Зифкать Туктаров, Ра­вил Хөсәенов, Са­мат Әк­баров, Марат Хәкимов өл­герлек күр­сәтте. Элекке агрономыбыз Касыйм Мөхитов та ярдәмгә килергә һәрчак әзер. Алар ике “ДТ-75”, “К-744” тракторларын, дүрт “Беларус”ны вакытында әзерлек сызыгына куйды. Мин аларның тырыш­лыгы өчен һәммәсенә рәх­мәт­ле. Уҗым культураларыннан тыш, яз 1100 гектарда, Ходай насыйп итсә, чәчүне башкарып чыгарга өметләнеп торабыз.
Альмира Фәнис кызы һәр елны орлык белән ярдәм иткән Илеш егетләренә — “Урожай” һәм “ООО Ялалов” җәм­гыятьләре җитәкчеләренә дә зур рәхмәтле. Предприятие, алар белән берничә ел үзара аңлашып-килешеп эшләп, Илеш районыннан бодай һәм карабодайның элита сортларын кайтарта. Үзара файдалы бу хезмәттәшлек быел да сынатмаган, ике як та канәгать калган. Әлеге вакытта хуҗалык ягулык-майлау материаллары һәм ашлама кайтара.
“Нур+Р” җәмгыяте җитәк­чесе Альмира ханымның йөзеннән нур бөркелеп торган кебек, хуҗалык басуларының да тиздән техника гөрелтесенә күмеләсенә, гәрәбәдәй бөртек­ләрнең бәрәкәтле туфракка сибе­ләсенә, алардан уҗымнар­ның иртәнге кояш нурларына коенып баш калтуына шиклән­мәскә мөмкин. Бирсен Ходай!

(Районнан әзерләнгән махсус сәхифәне PDF-версияда укыгыз).