Барлык яңалыклар
Авыл хуҗалыгы
29 апрель 2015, 22:09

Уңган хуҗа барысын да алдан хәстәрли!

Быел “Рәхмәтуллин” крестьян-фермер хуҗалыгында ашлык складын киңәйтү максаты да куялар.Ниһаять, һава шартларының яхшырып, көннәрнең җылынуы язгы кыр эшләрен киңрәк җәелдерү өчен дә мөмкинлекләр тудырды. Бу җәһәттән алдагы көннәрдә республика басулары чын-чыннан тракторлар гөрелтесенә күмеләчәк.

Федоровка районында да җаваплы кампанияне җитди әзерлек белән каршы алдылар. Эре аграр пред­прия­тиеләрдә генә түгел, крестьян-фермер һәм шәхси хуҗа­лыкларда да техника әле апрель башына ук тулы әзерлек сызыгына бастырылды. “Рәх­мәтуллин” крестьян-фермер хуҗалыгында да эш башлау өчен без килгәндә басуларның өлгерүен генә көтәләр иде.
— Хуҗалыкны 2003 елда оештырдык. Тәүге елларда 25 гектар җир эшкәрткән булсак, былтыр басуларны 150 гектарга җиткердек. Шуның 30 гектарын уҗым бодае, 15 гектарын мал азыгы культуралары били. Янә 80 гектарда арпа һәм бодай, 20 гектарда көнбагыш чәчеләчәк, — ди, эш планнары белән таныштырып, хуҗалык җитәкчесе Илшат Рәхмәтуллин.
Әйтергә кирәк, мөһим кампанияләрне үз көчләре белән башкару өчен хуҗалыкта җитәрлек техника тупланган. Бүген Рәхмәтуллиннардагы техника паркы ике “Беларус”, бер “Т-16” тракторларын, сабан-тырма, чәчү, җир эшкәртү, печән җыю агрегатларын, барлык тиешле корылмалары белән “Нива” комбайнын бер­ләштерә. Әйткәндәй, соңгысын узган көздә генә сатып алганнар һәм ул быел Әтәч авылы басуларына беренче тапкыр чыгачак.

Башкортстанда чәчү кампаниясе башланды. Әбҗәлил, Әлшәй, Гафури һәм Хәйбулла районнары эшчәннәре бөртекле һәм бөртекле-кузаклы культуралар чәчүгә беренчеләрдән булып төште. Бу дүрт районда язгы чәчү 600 гектарда башкарылган.