Үзебезнекенә ни җитә?

— Хөкүмәтебезнең чит илдән кертелүче продукциягә санкцияләр игълан итүе, аны тагын бер елга озайтулары бик тә дөрес адым булды. Халык та хәзер үзебездә җитештерелгән җиләк-җимешкә өстенлек бирә, — ди Рождественка авылы эшкуары. — Безне узган айда Уфада уздырылган “Җиләк тубылы” фестиваленә чакырдылар. Андагы ярминкәгә үзе­безнең иртән-иртүк җыелган ярты тоннага якын җиләкне дә алып барган идек. Башкалар кебек бер чиләк уңышны 800 сум белән тәкъдим иттек. Әйтерсең, башкалада сатып алучылар безне генә көтеп алганнар. Хакына карамастан, безнең тәмле җиләкне чират торып ярты сәгать эчендә алып та бетер­деләр. Мин шушы ярмин­кәдән үземә яңа илһам һәм дәрт алып кайттым. Димәк, без сатып алучылар ихтыяҗы өчен эшлибез, базар өчен үтемле продукция җитештерәбез.
Арытаба без бакчачы-фермер белән эшлекле сөй­ләшүне аның плантация­сендә дәвам иттек. Берничә ел элек кенә оештырылган хуҗалыкта әле җиләк 10 гектар мәйданны били. Быел бакчаны тагын 5 гектарга киңәйтергә җыеналар.
— Бу төр үсемлек бер елдан соң гына уңыш бирә, — ди Олег Мефодьевич. — Үзебезнең тәҗрибә участо­гында 60 төрле сортны сынап карадык. Шуларның өчтән бере, аеруча Голландия һәм Германия сортлары бездәге климат шартларында өметне акламады. Сортларны сынаганда без җимешнең тәм сыйфатына, уңыш бирүчәнлегенә, төрле үсемлек авыруларына биреш­мәвенә игътибар итәбез. Шулай ук безнең өчен җиләклекнең ничек кышлавы да мөһим. Чөнки сорт ничек кенә яхшы булмасын, әгәр ул кышкы салкыннарга бирешсә, алдагы сезонда бөтенләй уңышсыз калуың бар.
Быел “Шаран бакчалары” хуҗалыгында узган ел утыртылган биш гектарлык участок мул уңыш белән куандырган. Җиләк җыю исә бер айдан артыгракка сузылган. Бу эшне оештыруда фермерга тырышлыктан тыш тапкырлык һәм зирәклек күрсәтергә туры килгән. Чөнки җыеп алынган уңыш көнендә үк кулла­нучыларның өстәленә барып җитәргә, сыйфатын югалтмаска тиеш. Кызу чорда бар булдыклылыгын эшкә җиккән Олег Дмитриев максатына ирешкән дә инде.