Чикләү түгел, ярдәм кирәк!

Дөрес, эше авыр, табышы аз бул­гангамы, әллә инде Русия авыл­ларының күзгә күренеп картая баруына бәйлеме, башка сәбәптәнме, шәхси ихатада мал тотучылар сафы соңгы чорда елдан-ел сирәгәя. Мисал эзләп еракка китмичә, туган төягем – Бәләбәй районының Тузлыкуш авыл­ындагы хәлне генә китерәм. Моннан чирек гасыр элек авылда ике көтү булып, аларның һәркайсында 200-300 баш сыер малы исәпләнсә, бүген көтүләр 70-80 баш терлек белән генә чикләнә. Нәтиҗәдә, ай-ике ай үтүгә, абзыеңа янә көтү чираты килеп җитә. Чират тагы да тизрәк килеп җитәр иде, ярый әле авылда шәхси ихатасында күпләп сыер малы асраучы берничә булдыклы ир-узаманы бар. Алар хуҗалыгында дистәләгән баш мал тотып, мәх­лукларны гомум авыл көтүенә кушканга гына, көтү чираты аларда берничә атнага тоткарлана. Юкса, абзыеңа ай саен авыл башына чыгып чыбыркысын шартлатырга туры килер иде. Әмма ил Хөкүмәте даирәсендә шәхси ху­җалыклар эшчәнлегенә бәйле әлегәчә караш хөкем сөрүен дәвам итсә, бу көннең якын чорда килеп җитүе дә бик ихтимал.
Эш шунда, Русия Хөкүмәте Премьер-министры Дмитрий Медведев рәислегендә Сочида урып-җыю мәсьәләләре буенча үткән селектор киңәшмәсендә Ставрополь крае губернаторы Владимир Владимиров шәхси хуҗалыкларда терлек һәм кош-корт санына чикләү кертү тәкъдиме белән чыкты. Аның фикеренчә, бер хуҗалыкта сыер малы саны биштән, ә сарык егерме баштан артмаска тиеш. “Күпләп терлек асраучылар салым түләми, шул ук вакытта социаль яктан киеренкелек тудыра”, — дип белдерде ул. Әлеге тәкъдим ил Хөкүмәте тикшерүенә алынды. Атап әйткәндә, Премьер-министр Дмитрий Медведев илнең Авыл хуҗалыгы, Финанс, Икътисади үсеш министрлыкларына әлеге мәсьәләне һәрьяклы тикшереп, 23 сентябрьгә кадәр үз фикерләрен җиткерергә кушты. Шәхси хуҗа­лыкларда терлек һәм кош санына чикләүләр кертү-кертмәү турында мәсьәлә шуннан соң хәл ителәчәк.