+24 °С
Ачык
Гәзиткә язылуVKOKTelegram
Барлык яңалыклар
Авыл хуҗалыгы
27 август 2015, 21:05

Бөлгәнне тергезү - чирәм җир күтәрүгә тиң

Яңа оештырылган “Саламат” хуҗалыгында моны яхшы беләләр.Әлшәй районында иген 50 мең гектардан артыграк мәйданда үстерелде. Беренчеләрдән булып уракны “Колос-Агро” авыл хуҗалыгы предприятиесе башлап җибәрде, биредә бөртеклеләр 4 мең гектар били, уракта 7 комбайн эшли. Хуҗалыкта игеннәрнең 65 проценты суктырып алынган да инде.

Тоташ район буенча исә урак яртылаш тәмамланган дип әйтергә була. Уртача уңыш гектардан 16 центнер тәшкил итә. Аерым хуҗалыклар һәм культуралар буенча күрсәткечләр зуррак. “Колос-Агро”да 70 гектарлы уҗым бодаеның һәр гектары 31 центнер бирә. “Заря” җәм­гыятендә 67 гектарлы арыш басуында уңыш гектардан 30 центнер тәшкил иткән. “Башкортстан ашлык компаниясе”, “Колос” агрофирмасында да басулар мул уңыш белән куандыра. Шунысы игътибарга лаек: уҗым культуралары гектар төшеме буенча ышанычны аклаган, районда хәзерге вакытка тулай ашлык җыемының зур өлешен алар алып тора.
Чикләнгән җаваплылыктагы “Саламат” җәмгыятендә дә көздән уҗым бодаен һәм арышны мул чәчеп отканнар дип әйтергә мөмкин. Сөренте җирләр 9 мең гектардан артык тәшкил иткән хуҗалыкта бөртеклеләр быел 5 мең гектарда үстерелгән. Шуның биштән бере — уҗым культуралары. Уртача уңыш артык зурдан түгел — гектардан 12 центнер тирәсе. Әмма хуҗа­лыкта моңар­дан да канә­гатьләр. Эш шунда – “Башагропродукт” дәүләт пред­приятиесенең бүлеге сыйфатында “Саламат” 2012 елда оештырыла. Элекке инвес­торлар яңа хуҗалыкка матди-техник яктан бай мирас калдырмый, билгеле. Бу хакта “Саламат” җәм­гыяте җитәкчесе Әнвәр Зәйнуллин түбән­дәгеләрне сөйләде:
— Берничә ел дәвамында эшкәртелмәгән басулар ташл­ан­дык хәлдә иде, — ди ул. — Шуңа да безгә хуҗалыкны чирәм җирләрдәге кебек яңабаштан оештырырга туры килде. Банк кредитлары исәбенә 55 миллион сумлык авыл хуҗалыгы техникасы сатып алынды. Иң аянычлысы шул – авылда механизатор кадрларга кытлык килеп туган, чөнки күпләр эш эзләп чит төбәкләргә чыгып киткән. Шөкер, “Саламат”та тормыш җанланганын күреп, кире кайта башладылар. Җирнең уң­дырышлылыгын нәкъ менә алар белән күтәрәбез, ә алар ашлык кадерен яхшы белә.
Тракторчы Айрат Галиев — шуларның берсе. Элекке колхоз бөлгенлеккә тарыгач, ул да район үзәге пред­приятиеләренә йөреп эшләүгә күчә. Яше олыгаеп барган ирне гаиләдән аерылып яшәү ялкыта, билгеле.
— Яңа хуҗалык оештырылу хәбәрен ишетү белән эшкә чыктым, яңа трактор бирделәр, — ди ул. — Хәзерге вакытта ындыр табагында ашлык бушату-төяүгә билгеләделәр. Бер эштән дә чит­ләшкәнем юк, башкалар да шундый ук фикердә, чөнки туган төбәк барыбер үзенә тарта, монда безгә эшләргә һәм яшәргә.
Читайте нас: