Иксәң көнбагыш — алырсың табыш

— Көнбагыш уңышын җыеп алганда югалтуларны булдыр­мау һәм орлыкны черүдән саклау мөһим. Шуның өчен бу үсемлекнең биологиясен, өлгереш чорын исәпкә алып эш итәргә кирәк. Җыеп алу вакытында орлыкларның дымлылыгы якынча 18-20 процент булырга тиеш, өлгергән көн­багыш коелып әрәм булмасын өчен аны озакка сузмыйча җыеп алырга кирәк, — ди хуҗалыкның баш агрономы Радик Әскаров.
— Туң, кырпак көннәр көн­багыш суктыру өчен тагын да уңайлырак, — ди механизаторлар. — Эшне яңгырлар бераз тоткарлады, ләкин ай ахырына кадәр көнбагыш басуында эшне тәмамларбыз, дип өметләнәбез.
Былтыр “Салават” агрофирмасында уңыш гектарыннан 20 центнер тәшкил итсә, быел 22 центнерга җитә. Узган елда Русия буенча һәр гектардан 14 центнер җыеп алын­ганын исәпкә алсак, салаватлыларның уңышы күпкә артык.
Басудан ындыр табагына кайткан көн­багышны механизатор Римир Гыйззәтуллин төягеч белән киптерү җай­ланмасына бушата. Ашлык тазарту комплексы операторы Илһам Хәмзин һәм ындыр табагы мөдире Илдар Шәрипов өчен урып-җыю бүген дә дәвам итә.
Киптерелгән көнбагыш шундук Чишмә май сыгу заводына озатыла. Агрофирма җитәкчеләре сүзләренә кара­ганда, көнбагыш үзен үзе акларлык бәягә сатыла һәм хуҗалыкка шактый табыш кертә.