Күрсәтер эшләре, уртаклашыр тәҗрибәләре бар

Чара “Боҗыр” хуҗалы­гын­нан башланды. Аның җитәк­чесе Әгъләм Хөснетдиновның әйтүенә караганда, Боҗырдагы сөтчелек фермасында бүген 300 баш савым сыеры асрала, алардан көненә 23 центнер сөт савып алына. Узган елда хуҗалык терлекчелек продукциясе сатудан гына да 30 миллион сумга якын саф табыш алган, шуның 17 миллион сумы — сөт, 13 миллион сумы ит сатудан кергән.

Моңа нәрсә исәбенә ире­шел­­г­ән соң? “Сөтчелек фермасын “500 ферма” программасы буенча яңартып кору исәбенә”, — дип җавап­лый хуҗалык рәисе.

Программа кысаларында соңгы ике елда биредә 19 миллион сумлык яңартып кору эшләре башкарылган. Атап әйткәндә, абзарлар модерниза­цияләнгән, яңа саву заллары куелган. Боларның барысы да җитештергән продукциянең үзкыйммәтен киметергә мөм­кин­лек биргән. Мисалга, ферма яңартып корылганчы бер айга 120 мең киловатт электр энергиясе сарыф ителсә, хәзер ел буена нибары 150 мең киловатт кына кулланыла.

Бүген фермада барлыгы 29 кеше хезмәт сала. Аларның һәркайсына үз хуҗалыгында да күпләп мал асрап яшәү мөмкинлеге тудырыла. “Эш шартларыннан һәм хезмәт хакларыннан канәгатьбез. Үз җиреңдә тырышып эшләүгә ни җитә?!” — ди фермада эшләү­челәр.

Әлеге вакытта фермада 149 баш терлек симертелә.

— Узган елда 1200 центнер ит җитештердек. Быел да шул санны түбән төшермәскә исәп, — ди хуҗалык риәсе Әгъләм Хөснетдинов.

М. Хәсәнов исемендәге кооперативта да мал кышлату югары дәрәҗәдә оештырылган. Бүген хуҗалыкта 1000 баш мөгезле эре терлек, шул исәп­тән 250 баш савым сыеры, исәпләнә. Алардан көненә 17 центнер сөт савып алына.
Хуҗалыкта малларны ясал­­ма орлыкландыруга да зур игътибар бирелә. Узган ел­да махсус бүлмә кирәкле җиһазлар белән тәэмин ител-гән.

Кышлату барышын караучылар алдында чыгыш ясап, М. Хәсәнов исемендәге хуҗа­лык рәисе Фаиз Газизов мал абзарларында яңартып кору эшләре алып бару кирәклеген билгеләп үтте:

— Киләчәктә сөтүткәргеч һәм суыту җиһазы кую җи­тештерелгән сөтнең сыйфатын арттыруга сизелерлек өлеш кертер иде. Әле без эшне шул юнәлештә алып барабыз, — диде ул.

Район хакимияте башлыгы Александр Андреев ике хуҗа­лык­та да малларны кышла-туның югары дәрәҗәдә оештырылуын билгеләде һәм арытаба да аларга җиңел булмаган эшләрендә уңышлар те­ләде. Район авыл хуҗалыгы идарәсе белгечләре исә фермаларда санитар таләпләрне үтәү, терлекләрне баланслап ашату буенча анык һәм төпле киңәшләр бирде.