+9 °С
Болытлы
Гәзиткә язылуVKOKTelegram
Барлык яңалыклар
Авыл хуҗалыгы
12 Май 2016, 02:00

Алдынгы технологияләр басуда сынала

“Кыдаш” хуҗалыгында язгы кыр эшләрендә заманча техника әйдәүче көч булып тора.“Кыдаш” хуҗалыгында быелгы язгы чәчү мәйданы 1700 гектар тәшкил итә. Шуның яртысыннан күбрәге сабанашлыкка бирелә. Моннан тыш, 800 гектарда чәчелгән уҗым культураларына да зур өметләр баглыйлар.

Баш агроном Вәкил Латыйпов белдерүенчә, бу җәһәттән ышаныч акланырга тиеш, чөнки уҗым яхшы кышлаган, үсентеләр дәррәү күтәрелә. Моннан тыш, басуларның зур өлешендә өстәмә тукландыру үткәрелгән. Гомумән, соңгы елларда хуҗалыкта минераль ашламалар куллануга зур игътибар бирелә. Әлеге агротехник чараның Хөкүмәт тарафыннан дәртләндерелүе, ягъни минераль ашламага субсидия бирелүе дә зур әһәмияткә ия.

– Заманча техника, алдынгы технологияләрдән башка басучылыкта зур уңышка исәп тотып булмый, – ди “Кыдаш” хуҗалыгы рәисе, Башкортстанның атказанган авыл хуҗалыгы хезмәткәре Риян Латыйпов. – Әлеге хакыйкатьне аңлау гына аз, аны көндәлек эшчәнлектә кагыйдәгә әйләндерү зарур.

Матди-техник базаны яңарту максатында соңгы чорда берничә авыл хуҗалыгы машинасы, шул исәптән “Флексикойл” чәчү комплексы сатып алынган. Быелгы кыр эшләрендә нәкъ менә алар әйдәүче көч булып тора да инде. Мәсәлән, арпа чәчүне ике “Омичка” агрегаты алып бара. Алар элекке елларда ук сынауны уңышлы үткән. Югары җитеш­терүчәнле чәчкеч­ләрне яшь механизаторлар Илнар Хәйбрах­манов һәм Илнур Шәймө­хәммәтов нәтиҗәле куллана. Чәчкечләрне орлык белән тәэмин итүдә шофер Камил Латыйпов, төяүдә Нур Латыйпов тырышып эшли. Нәтиҗә­дә, чәчүдә һичбер тоткарлык юк, шуңа да кыр эшләре гөрләп бара.

Сызма культуралардан көн­багышны 200 гектарда үстерү планлаштырыла. Бу тармакта да техника яңартылып тора. Атап әйткәндә, ике ел элек орлыкны төгәл нормада күмдерүче ТСН-4,5 маркалы чәчкеч сатып алынган булса, быел аңа шундый ук яңа агрегат өстәлгән. Әлеге техникада көн­багыш чәчү механизаторлар Илдар Мөфтахов белән Әсгать Кашаповка йөкләтелгән.

Табигатьтә соңгы еллардагы үзгәрешләр аркасында, Кәпәй-Кобау авылы янындагы күп кенә басуларда сулыклар барлыкка килгән. Басуның туфрак кипкән өлешен чәчеп, агрегатларны башка урынга күчерү биредә гадәти хәлгә әйләнеп бара. Шикәр чөгендеренә быел хуҗа­лыкта 300 гектар мәйдан бир­мәкчеләр, данлыклы чөгендерче, Башкорт­станның атказанган авыл хуҗа­лыгы хезмәткәре Зәбир За­һидуллин тырышлыгы белән шуның 100 гектары чәчелгән дә инде.

“Кыдаш”ның чәчү әйләнешен­дә мал азыгы культуралары шулай ук зур мәйданнар алып тора. Күпь­еллык үлән басуларына өстәп, 150 гектарда берьеллык үлән чәчелгән. Быел кукуруз планта­цияләрен киңәйтү күздә тотыла – мәйданнар 400 гектарга җиткереләчәк. Шуның 100 гектарында куккурузны чәкәнгә үстерү планлаштырыла. Әйтергә кирәк, моның өчен ныклы җирлек бар. Техника ягыннан мәсьәлә хәл ителгән, технология куллану буенча механизаторларның тәҗ­рибәсе җитәрлек. Минераль ашламалар – шулай ук җиткелекле күләмдә. Әйткәндәй, быелгы кыр эшләренә “Кыдаш”та 300 тоннадан артык ашлама тупланган, ә бу һәр гектарга 35 килограмм хәрәкәттәге матдә дигән сүз.

Хуҗалыкта алдагы чорны да күз уңыннан ычкындырмыйлар. Атап әйткәндә, химик утау агрегатлары әзерләнеп куелган.

Моннан тыш, хуҗалыкта киләсе урып-җыюга да әзерлек башланган, дип әйтергә мөмкин. Мәсәлән, үзәк ындыр табагында ашлык эшкәртү корылмалары тулысынча алыштырылачак. Махсус җиһазларны хуҗалык үз акчасына сатып алган. Озакламый аларны монтажлау башланачак.
Читайте нас: