Бер-берсенә терәк, башкаларга үрнәк алар

— Кече бизнеста тәүге адымнарыбызны кечкенә сәү­дә нокталары төзүдән башладык, — дип сүз башлап, ачык йөзле хуҗалар кунак­ханә буйлап экскурсия оештырды. — Ун ел элек Аскарда бина сатып алып, заман таләпләренә җавап бирүче район үзәгендәге беренче кафены төзедек. Безнең якларга килүче кунаклар да, алар­ның таләпләре дә артты. Ихтыяҗны күздә тотып кунак­ханә, мунча, автосервис һәм автомобиль юу урыны ачтык. Без төзегән бильярд залыннан да халык өзелми. Башта Магнитогорск — Баймак, Аскар — Уфа юллары киселе­шен­дә “Элита” кафе-кунакха­нәсе төзегән идек. Ул кунакларга тамак ялгап, хәл җыю өчен уңайлы урынга әверел­де. Хәзер исә “Гостиный двор” кунакханә комплексы аерым игътибарга лаек. Биредә яшәү шартлары да, хезмәт­ләндерү дә югары дәрәҗәдә оештырылган. Кунакларга сауна, бассейн, бильярд зал­лары тәкъдим ителә. Монда мәҗлесләр үткәрү залына 100 кеше сыя ала. Заманнан калышмаска, киләчәктә дә камиллеккә омтылып яшәргә тырышабыз. Тормыш алга бара. Хәзер Урал аръягы халыкара форумнар оештыру үзәгенә әверелде. Бездә булган кунаклар канәгать калырга тиеш. Бу максатка ирешә алсак, төбәккә туристлар агы-мының тагын да артачагына өмет зур.

Уңган эшкуарлар бик күп район, республика һәм ил дәрә­җәсендәге башка конкурсларда, күргәзмәләрдә дә бүләкләнгән. “2013-18 елларда Башкортстан Республикасында кече һәм урта эшкуарлыкка ярдәм итү һәм үстерү” озайлы программасы кысасында “Ел эшкуары — 2014” конкурсы үткән. Бәйге йомгаклары буенча Айрат Зиннәт улы “Хезмәтләндерү өлкәсендә ел эшкуары” номи­нациясендә җиңгән. Конкурста Башкорт­станның район һәм шәһәр­ләреннән 78 гариза килгән. Димәк, авыз тутырып, рес­публиканың иң яхшы шәхси кунакханәсе Әбҗәлил районында урнашкан, дияргә нигез бар.

Заман белән бергә атлаучы эшкуарлар хәйрия эшенә дә игътибар бүлә. Әминевлар район мәдәният сараенда өлкәннәргә хәйрия концертлары оештырган. Тамашачылар каршында Айдар Галимов, Радмир Туйсин, Хәсән Усманов, Артур Туктагулов, Миңзифа Искужина һәм республиканың башка эстрада йолдызлары чыгыш ясаган. Белем көне алдыннан мохтаҗ гаиләләргә матди ярдәм күрсәтелә. Районның иң яхшы спортчылары һәм өлгер укучылары ел саен хәстәрлекле эшкуарлар кулыннан стипедияләр ала. Хәйрия, ярдәм чаралары исемлеген арытаба дәвам итеп булуы Әминевларның мәрхә­мәтлелеге, җәмгыятькә файда китерергә омтылып яшәве турында сөйли.

Соңгы елларда Урал аръягы Башкортстанның икътисади үсешкән, инвесторлар игътибарын җәлеп иткән төбәкләренең берсенә әве­релде. Димәк, киләчәктә кунак­ханәләргә ихт­ыяҗ тагын да артачак дигән сүз. Әбҗә­лил районына килү­челәрнең кайда урнашачагы көн кебек ачык.