Беркем дә бүләксез калмады

Бу көнне “Үзәк” машина-технология станциясе Дүр­төйле филиалының Миңеште бүлекчәсе җәйләвенә күп кунаклар килде: һәр хуҗалык бәйгегә үзенең иң уңган, иң булдыклы вәкил­ләрен җибәр­гән иде.

Терлекчеләрнең һөнәри ярышы берничә өлештән торды: биредә теоретик белемең­не генә түгел, эшеңне гамәлдә күрсәтү дә кирәк. Бәйгечеләр, имтихандагы кебек, билетлар алды, сорауларга җавап бирде, маллар утарында да эшләде. Авыл хуҗалыгы идарәсенең баш зоотехнигы Фәнис Хәкимов җитәкчеле­гендәге таләпчән жюри аларның һәр хәрәкәтен энә күзеннән үткәрде.

– Быел савучылар бәйгесе район тарихында 45нче, ә ясалма орлыкландыру техникларыныкы 24нче тапкыр уза, – диде Фәнис Рифгать улы. – Шунысы күңелле: хезмәтчәннә­ребез һөнәри осталыкларының югары икәнлеген республика дәрәҗәсендә дә исбатлый. Мисал өчен, берничә ел элек “Россия” токымчылык заводы савучысы Рима Сәр­вәрова республика бәйгесендә икенче урын яулады. “Киров” хуҗалы­гыннан Ирина Бакае­ваның да пьедесталның шушы ук баскычына күтәрелгәне бар. Ә менә “Вәлиев” хуҗалы­гыннан ясалма орлыкландыру технигы Ләйсән Галләмова Бөтенрусия конкурсында өчен­че урын алган иде. Аңа кадәр мондый абруйлы бәйгедә “Чишмә” токымчылык заводыннан Азат Маннановның җиң­гәне булды.

Саву җайланмаларын сү­теп җыйганда ап-ак халатлы бәйгечеләрнең кулларына күз иярми: хәрәкәтләре шулкадәр төгәл, килешле! Бары әллә ничә пар күз карап торганга гына бераз дулкынлануларын алланып киткән йөзләреннән белеп була.

Сыер саву осталыгына имтихан бәйгенең икенче этабы булды. Бәйгечеләрнең малкайлар белән ничек мөга­мәлә итүенә дә, савылган сөт­нең чисталыгына да бәя куелды.

Беренче урынны “Чишмә” хуҗалыгыннан килгән яшь савучы Зәлия Дебердеева яулады.

–Җиңүемә ихлас шат­мын, – дип елмайды Зәлия Рим кызы. – Ә мондый ярышта беренче тапкыр гына катнашуым.
Яшь кенә булуына карамастан, Зәлия өч бала әнисе икән. Ире Наил дә “Чишмә”дә алдынгы механизатор.
Сыер савучылар арасында икенче урынны “Киров”тан Ирина Бакаева алды, ә өченче урынны “Крупская” хуҗалыгын­нан Светлана Сайтаева һәм “Үзәк” МТСының Дүртөйле филиалыннан Земфира Мостафина бүлеште.

Бер үк вакытта мәйданның икенче яртысында ясалма орлыкландыру техникларының бәйгесе барды. Аларның да һәрберсе үз эшен җиренә җиткереп башкарырга тырышты. Моның өчен җәйләүдә барлык мөмкинлекләр дә тудырылган иде: заманча җиһаз­лан­дырылган лаборатория, туңдырылган орлык материалы, эш кораллары – берсенә дә сүз тидерерлек түгел. Ясалма орлыкландыру техниклары арасында иң яхшысы дип “Киров” хуҗалы­гыннан Гаяз Тимергалиев табылды. Гаязның мондый бәйгеләрдә бихисап тапкыр җиңү яулаганы бар. Тормыш иптәше Гөлшат та – “Киров”та селекционер. Яхшы белгечләр гаиләсенә хуҗалык идарәсе йорт салып биргән.

Икен­че урында – Ленин” хуҗа­лыгыннан Тамара Хәби­рова, өченче урында – “Горшков” токымчылык заводыннан Василий Атыев һәм “Рос­сия”дән Илүсә Рәхим­җанова.

Терлекчеләр өчен район бәйгесе, һәрвакыттагыча, чын бәйрәмгә әверелде. Алар мул сыйлы табын артында бер-берсе белән аралашып, Ми­ңеште мәдәният йорты үзеш­чән артистлары әзерләгән матур концерт карап ял итте. Шуны да әйтик: чарада катнашучыларның берсе дә бүләксез калмады. Район хакимияте башлыгы Ринат Хәйруллин тапшырган саллы премияле конвертлар терлек­челәрнең гаилә бюджетын тулыландырса, матур медаль­ләр, Мактау кәгазьләре, әл­бәттә, җиңүчеләренең архивына кадерле истәлек итеп салып куелачак.