-16 °С
Болытлы
Гәзиткә язылуVKOKTelegramЯRus
Барлык яңалыклар
Авыл хуҗалыгы
13 апрель 2017, 02:00

Авылны “кооперация” коткарырмы?

Чит төбәкләргә йөреп эшләүчеләр саны 130 мең кешегә җитә. Сәбәбе нәрсәдә?Узган атна да республиканың социаль-икътисади үсеше белән бәйле мөһим вакыйгаларга бай булды. Шуларның икесе турыдан-туры авыл проблемаларына, кече малтабарлыкны, продукция җитештерүчеләр арасында кооперацияне үстерү мәсьәләләренә багышланды.Башкортстан Башлыгы Рөстәм Хәмитов республиканың Икътисади үсеш министрлыгы коллегиясендә катнашты. Анда ул икътисадны, инвестицион эшчәнлекке үстерү юнәлешендә яңа бурычлар билгеләде. Рөстәм Зәки улы яңа эш урыннары булдыруда, бигрәк тә авыл җирендә кече малтабарлыкны үстерүдә мөмкинлекләрне нәтиҗәлерәк файдаланырга кирәклеген ассызыклады. “Бу өлкәдә аеруча авыл җирендә хәл кискен тора. Анда 1,5 миллионнан күбрәк кеше яши. Һәм эш урыннары булдыруда анда проблема гаять зур. Шулай булуга карамастан, бүген безнең авылда яңа эш урыннары булдыру буенча анык кына сәясәтебез юк...”, диде республика Башлыгы коллегия утырышында.

Икенче чарада – Авыл хуҗа­лыгы министрлыгы үткәргән киңәш­мәдә — Рөстәм Зәки улы атап үткән проблемаларның чишелеше бер­никадәр чагылыш тапты. Ведомство җитәкчесе Илшат Фазрахманов рәислегендә узган чарада республикада авыл хуҗалыгы җитештерү-тәэмин итү һәм кредит кулланучылар кооперативларын оештыруны тизләтү мәсьәләләре каралды. Эш шунда: республика Башлыгы авылда эшсезлекне киметүдә кече малтабарлыкны үстерү, алар җитеш­тергәнне сатудагы каршылыкларны бетерү бурычын билгеләсә, авыл хуҗалыгы бу проблеманы хәл итүдә коопе­рацияне үстерүне төп юнә­леш­ләрнең берсе буларак карый. Әл­бәттә, Рөстәм Зәки улының югарыда телгә алынган утырышта: “Республика авылларыннан 120-130 мең кеше башка төбәкләргә йөреп эшли. Ә без авылдагы бүгенге икътисади хәл-шартларда боларны белә торып та канәгать йөз күрсәтүне дәвам итәбез”, — дип белдерүе проблеманы яңа биеклеккә күтәрде.
Аграр җитештерүне социаль яктан якланган авылдан башка күз алдына китереп булмый. Кайчан­дыр, яшьләрне авылда калдыру өчен мәдәният учагы, кибет һәм яхшы юллар, аннары шәһәр­некеннән ким булмаган хезмәт хакы кирәк, дип уйлыйлар иде. Алары да хәл ителеп бара. Ә ни өчен соң ул чагында авылдан йөзләрчә мең кеше башка төбәкләргә йөреп хезмәт салырга мәҗбүр? Республика Башлыгы моның чишелешен авылда яңа икътисади модель барлыкка китерүдә күрә. Дөрестән дә, халыкны эшле итү, крестьян җи­тештергәнне аның үзенә файда китерерлек итеп сатуны оештыру, гомумән, авыл территорияләрен, аларның үзаллылыгын, урындагы бюджетны үстерү, беренче чиратта, эчке сәүдә базарын экологик яктан чиста ит-сөт продукцияләре, яшелчә белән тәэмин итүдә чын мәгънә­сендә “Башкортстан НЭПы” булыр иде.
Читайте нас в