Иген иккән — илне тук иткән!

Ләкин менә Гафури райо­­нының данлыклы Ленин исе­мендәге колхозын саклап калганнар. Ул гына да түгел, аны яхшы эшләү­челәр сафына чыгарганнар. Өч ел элек хуҗалыкның элекке рәисе Марат Мөстә­кыймов хаклы ялга чыккач, эстафетаны булдыклы җитәкче Риф Мөэминов кабул итеп алган. Әйткәндәй, шушы ук Ялгызкаен авылында аның “Мөэ­минов” крестьян-фермер хуҗалыгы да уңышлы эшләп килә. Ике оешмада 50 кеше хезмәт сала. Хуҗалык Азат Ярмө­хәм­мәтов, Радик Гобәйдул­лин, Илдус Вәли­шин, Владимир Михайлов, Наил Кил­мөхәммәтов кебек уңган эшчеләргә таяна.
Ленин исемендәге колхозда башлыча терлекче­леккә йөз тоталар. Биредә 543 баш мал асрала, шу­лар­ның 135е — савым сыеры. “Мөэминов”та сугым өчен 76 баш мөгезле эре терлек асрала.
Быел ике хуҗалык 600 гектар мәйданда — чөген­дер,1560 гектарда — бөртекле культуралар, 140 гектарда көнбагыш чәчкән.
— Шөкер, техника җитәр­лек. Элек Ленин колхозы басу эшләренә МТС­ларны җәлеп итә иде, безнең андый мохтаҗлы­гыбыз юк, — ди Риф Мөэминов.
Быел чәчү мәйданна­рына 300 тонна ашлама кертелгән. Аларның, ягулык-майлау материал­ла­рының хакы елдан-ел күтәрелә. Ә менә тир түгеп үстергән игеннең бәясе төшә. Әйтик, былтыр көнбагышның бер килограммын 20 сум белән сатсалар, быел 15 сум булган. Шу­­лай ук Мәләвез шикәр заводына озатылган чөген­дер өчен алынган шикәрнең дә хакы арзанайган.
— Базарда тотрыклылык юк, шуңа бизнес-план төзү мөмкин түгел, кредит алу хәвеф тудыра. Европада, әйтик, бөртекле ашлык концерны эшләп килә. Анда бер монополист булгач, хаклар да бер төрле генә. Бездә исә хакларны арадашчылар куя, — дип уфтана җитәкче.
Шушы авылда туып-үскән, хезмәт юлын үсмер чагында комбайнчы әтисенә ярдәмче булып башлаган Риф Вәкил улына җир эше бәләкәйдән таныш. Мәктәп­не тәмамлагач, ул алдагы гомерен тик авыл белән бәйләргә ниятли. Теләген тор­мышка ашыру өчен Бәлә­бәй авыл хуҗалыгы техникумына укырга керә. Өч ел автомеханик булып эшләгәч, 1993 елда крестьян-фермер хуҗалыгын оештыра. “Мөэминов” районда һәр­вакыт алдынгылар сафында икән, бу, иң элек, булдыклы җитәкче тырышлыгы нәтиҗәсе.
Ә бит ул, үзеннән өлкән­рәк өч абыйсы кебек, Себер якларына йөреп эшли алган булыр иде. Ләкин Риф Вәкил улының йөрәге авыл дип өзгәләнә, бер генә участокта тәртип булмаса да, аның җаны тыныч түгел. Әле менә хуҗа­лыкка ветеринария табибы кирәк. Агрономнары Әхәт Тимеров хаклы ялда килеш эшләп йөри. Хәер, соңгы­сын алыштыручы бар. Мөэ­минов­ның улы Денис тиз­дән Башкортстан дәүләт аграр универси­те­тының агрономнар әзер­ләүче факультетын тәмам­лаячак. Димәк, Мөэми­новлар династиясе дәвам итә!
Крестьян-фермер хуҗа­лыгын җитәкләвенә киләсе елда 25 ел тула. Ә шушы көннәрдә Риф Вәкил улы үзе 50 яшьлек юбилеен билгели. Иген иккән — илне изге иткән, иген иккән — илне тук иткән, диләр. Яз — чәчүдән, көзен урактан кайтып кермәгән, туган җиргә муллык китерүче, өстәлләр­не сыйга тутыручы игенчегә яңадан-яңа уңышлар юлдаш булсын!