Кем остарак, кем алдарак?

Бәйгечеләрне һәм кунакларны иртән үк бәйрәм кәефе, районның үзешчән артистлары, мәдәният йортлары хез­мәт­кәрләре башкаруындагы җыр-биюләр каршы алды. Стәрлетамак район хакимияте башлыгы Рөстәм Баһаветди­нов чыгыш ясап, авыл хуҗа­лыгы продукциясен җитеш­терү буенча районның озак еллар буе республикада алдынгы урыннар биләвен бил­геләде. Һәм бу уңышлар, әл­бәт­тә инде – район авыл хуҗалыгы предприятиеләре хезмәтчәннәре, белгечләре һәм җитәкчеләренең фидакарь хезмәт җимеше.
Мондый һөнәри бәйгеләр – иң осталарны ачыкларга булышлык итүче ярыш мәйданы гына түгел, белгечләр өчен тәҗрибә уртаклашу, аралашу өчен менә дигән мөмкинлек тә.
Район хакимияте башлы­гы­ның авыл хуҗалыгы буенча урынбасары Салават Фәритов шуны ассызыклады: машина белән сыер саву сөтчелек фермасында иң җаваплы процессларның берсе. Аның нәтиҗәсе саву корылмала­ры­ның сыйфатына да, савучы­лар­ның осталыгына, беле­менә дә бәйле. Шулай ук яхшы күрсәткечләргә малларның токымы да йогынты ясый. Дөнья­күләм тәҗрибә күрсәтүенчә, маллар сыйфатын яхшырту ясалма орлыкландырудан баш­ка мөмкин түгел. Бу җәһәттән Стәрле­тамакта эш югары дәрәҗәдә куелган. Саннар шул хакта сөйли. 2016 елда район терлекчеләре 40 мең тонна сөт, 19 мең тоннадан артык ит җитештерделәр. Һәр сыердан 5692 килограмм сөт савып алынды, тәүлеклек артым 700 грамм тәшкил итте. Бүген тәүлегенә 115 тонна сөт савып алына, район буенча һәр сыердан көненә – 17,7, ә кайбер хуҗалыкларда 20-23 килограмм сөт савыла.
Бәйгедә район хуҗалыкла­рыннан 11 савучы һәм 15 ясалма орлыкландыру технигы көч сынашты. Абруйлы жюри, бәйгегә йомгак ясап, алдынгыларны билгеләде. Машина белән сыер савучылар арасында Ирина Айгөлева (“Дуслык”), Людмила Храповецкая (Калинин исемендәге хуҗа­лык), Аделина Шә­фыйкова (Салават агрофирмасы), Айсылу Таһирова (“Фрунзе”) җиңеп чыкты. Ясалма орлыкландыру техникларыннан Лилия Галина – беренче (“Рощинский” совхозы), Маргарита Патраева (“Авангард”), Азамат Әхмәтшин (Калинин исеме­ндәге хуҗалык) – икенче, ә Светлана Юраш (“Дуслык”) өченче урынны яулады. Барлык җиңүчеләр акчалата бү­ләк­ләргә һәм ихлас тәбрик­ләүләргә лаек булды.