Аблай уңганнары ярдәм кулы сузды!

Алар оештырган кооператив Уфада сөт ризыклары өләште

“Гамьле авыл” (“Живое село”) исеме астында берничә төрле сөт ризыгы: сөт, ак һәм кызыл эремчек, каймак, катык, сыр җитештерелә. Чакмагыш, Благовар районнары фермерларыннан, шәхси хуҗалык­лардан җыелган сөт Уфадагы цехка алып килеп эшкәртелә һәм “Полушка”, “Бәйрәм” сәүдә челтәр­ләре аша сатуга чыгарыла. Сатып алучылар аблай­лыларның продукциясен бик тиз үз иткән, чөнки табигый сөт ризыкларына ихтыяҗ һәрвакыт зур.

Коронавирус пандемиясе чорында кооператив әгъзала­ры үзара киңәшләшеп, башка­ланың Ленин районындагы Нижегордка бистәсен­дәге йортларга сөт ризыкларын илтеп бирүне оештырырга уйлаган. Сугыш ветераннарына, кайбер аз керем­ле гаиләләргә сөт ризыкларын бушлай да өләшкән-нәр. Шулай ук 4нче санлы йогышлы авырулар дәваханә­сенә 15 капчык күчтәнәч илтеп биргәннәр. Аларның һәрбер-сенә үзләре җитеш­тер­гән сөт ризыкларының бөтен төрләрен дә салганнар.
“Күчтәнәчкә дәваханәдә бик шатландылар, — ди ко­опе­ратив җитәкчесе Айдар Габдуллин. — Бәла килгәндә, ярдәмнең ниндие дә кадерле. Игътибар күрсәтү, хәл сорашу үзе үк зур савап бит”.
Айдар Наил улы — гомерен авыл хуҗалыгына багышлаган кеше. 1984 елда авыл хуҗа­лыгы институның агрономия факультетын тә­мамлагач, Чакмагыш райо­ны­ның Аблай авылындагы “Правда” күмәк хуҗа­лыгында агроном, колхоз рәисе булып эшли, авыл хакимияте башлыгы вазыйфасын да башкара. 2000 елдан фермерлык белән кызыксына башлый. Соңгы елларда сөт эшкәртеп сату белән шөгыльләнә. Бу эшкә тотынуга авылдашларына ярдәм итү теләге дә этәргеч биргән.
2018 елда ул берничә ип­тәше белән берлектә “Керемне үстерүче проектларга ярдәм итү” программасында катнашырга карар итә. Мо­ның өчен көчле бизнес-проект төзергә, комиссия алдын­да аны яклап чыгыш ясарга кирәк була. Нәтиҗәдә, конкурстан үтеп, былтыр 2 миллион сум грант алуга ирешә­ләр. Бу акчага кирәкле җи­һазлар, эшкәртү цехы төзү өчен материаллар сатып алына. Кооператив бү­ген­ге көндә 3 крестьян-фермер хуҗалыгын, 12 шәхси хуҗа­лыкны берләштерә.
— Авыл халкы, шәхси ху­җа­лыклар сыер малын күб­рәк тотса иде, дигән теләк бар иде. — ди Айдар Наил улы. — Ләкин бу идея психологик каршылыкка очрады. Эшләргә көче һәм теләге бул­ган аерым гаилә­ләр бе­лән хезмәттәшлек итү уңайлырак булып чыкты. Мисалга, былтыр авылдашыбыз Фәния Нурисламова “Агростартап” программасы буен­ча 3 миллион сум грант алды. 20 баш бестужев токымлы сыер кайтартты. Фәниянең Себердә эшләп йөргән җәмә­гате Рөстәм дә бу эшкә кушылды. Гаилә фермалары киләчәк-тә артса иде, дип эш алып барабыз.
Гомумән, гомер буе җир­дә эшләгән, авылда яшәгән кеше буларак, кооперативларга зур өмет баглыйм. Революциягә кадәр Русиядә 40 меңләп ко­опе­ратив бул­ган, алар беренче Бөтендөнья сугышын күтәреш-кән, шинельләр, итекләр, азык-төлек җитештергән. Аннары алар тарих мәйданыннан бераз югалып тордылар. Соңгы чорда янә аларга яшел юл ачылды. Бу бик кирәк һәм вакытлы гамәл. Аллаһ боерса, коронавирус пандемиясен дә җиңәр­без, — дип, килә­чәккә өмет бе-лән карый кооператив җитәк­чесе.

Дилбәр СӨЛӘЙМАНОВА.
Чакмагыш районы.