+28 °С
Болытлы
Авыл хуҗалыгы
21 июль 2020, 13:45
Яңа үзәк ачылды
Кырмыскалы районындагы бу үзәктә 70 эш урыны барлыкка киләчәк.
Бүген Кырмыскалы районының Кабак авылында Башкортстан Башлыгы Радий Хәбиров «Кировец-Уфа» җәмгыятенең дилерлык һәм сервис үзәген - Петербург трактор заводында җитештерелгән авыл хуҗалыгы тракторларының рәсми дилерын ачу тантанасында катнашты.
- Бүген бездә үзенчәлекле көн - дилерлык һәм сервис үзәге ачыла, алар - безнең аграрийларга якын һәм аңлаешлы «Касемьсот» тракторлары, - диде төбәк җитәкчесе. - Безнең авыл хуҗалыгы хезмәтчәннәре өчен мондый техника бик кирәк. Һәм без һәрвакыт авыл халкына ярдәм итәчәкбез, агросәнәгать комплексының матди-техник базасын ныгытачакбыз.
Үзәкне ачу тантанасында беренче сатып алучы, фермер Рамил Мирсәетов "К-525" тракторы ачкычын алды.
Исегезгә төшерәбез: республикада тракторларга хезмәт күрсәтү, ремонтлау һәм модернизацияләү, шулай ук авыл хуҗалыгы җиһазларын әзерләү инициативасы белән эшкуар Радик Хафизов чыгыш ясады. Шушы елның апрелендә "Инвестчас"та бу идеяне хупладылар, ә бер атнадан соң булачак үзәкнең төзелеш мәйданчыгында төбәк җитәкчесе булды.
2024 елга кадәр планнарда - тагын бер җитештерү бинасы төзү, кирәкле технологик һәм станоклы җиһазлар сатып алу. Проектка инвестицияләрнең гомум күләме 300 миллион сум тәшкил итәчәк. Районда 70 яңа эш урыны барлыкка киләчәк.
Радий Хәбиров Петербург трактор заводы директоры Сергей Серебряков белән бергә җитештерү-техник үзәк эшчәнлеге белән танышты, эретеп ябыштыру, металл эшкәртү участокларын карады.
- Республикада туып, читкә чыгып киткән, ә аннары туган җиргә кайтып, җитди инвестицияләр салган якташларыбызның бу башлангычына шатмын. Мондый башлангычларны без һәрвакыт хупларга әзер, - дип ассызыклады Башкортстан Башлыгы. - Ышанам, бу үзәк Кырмыскалы районы өчен уңышлы предприятие булачак.
Фото:glavarb.ru
