“Ленин”лылар юл күрсәтте!

Дүртөйле районында иртә культураларны чәчүгә беренчеләрдән булып республикада киң билгеле токымчылык заводы уңганнары төште.

– Чәчү кампаниясенә җитди әзерлек белән килдек, – дип уртаклашты хуҗалык җитәкчесе Альберт Дәүләтбаев. – Быел без 53 миллион сумлык яңа техника сатып алдык, ягулык-майлау материаллары, минераль һәм катлаулы ашламалар – барысы да җитәрлек күләмдә тупланды. Орлык яңарту белән даими шөгыльләнәбез. Безнең хуҗалык ике юнәлештә – токымлы мал үстерү һәм орлыкчылык өлкәсендә аеруча җитди эш алып бара, чөнки казнабызны нәкъ менә алар тулыландыра. Әйткәндәй, быел чәчүгә, былтыргы чор белән чагыштырганда, җиде көнгә соңрак – 19 апрельдә төшәбез – яз шулай килде, әмма басуларыбыз мул уңыш белән сөендерер дип ышанабыз.

“Ленин” уңганнарын язгы чәчүгә төшү уңаеннан Дүртөйле районы хакимияте башлыгы Риф Йосыпов ихлас тәбрикләде, аларның быел да сынатмаячагына, бураларының иген белән тулачагына ныклы ышаныч белдерде.
“Ленин”лылар чәчүне беренче санлы 183 гектарлы басуда башлап җибәрде. Мамык кебек кабарып торган туфракка беренче орлыклар төшкәнче, авыл мәхәлләсенең имам-хатыйбы Альберт Нурумбәтов, игенчеләргә уңышлар юлдаш булуын теләп, ата-бабаларыбыздан калган күркәм йола буенча Коръән сүрәләре укыды.
Гасырлар төпкеленнән килгән гадәткә ярашлы, чарада катнашучылар буразнага пешкән тавык йомыркалары чәчте, иген башаклары да шундый зур булсын дип теләде.

Хуҗалыкның баш агрономы Ришат Гәрәев белдерүенчә, быел токымчылык заводы игенчеләре алдында язгы чәчүне 4300 гектарда башкару бурычы тора. Бүген 4 мең гектарда дым каплату эшләре төгәлләнгән, 1022 гектарда — күпьеллык үлән­нәрне, 900 гектарда уҗым культураларын тукландыру һәм тырмату башкарылган.
— Чәчүне борчактан башлыйбыз, — диде Ришат Фәрит улы. — Җир яхшы өлгерде, техника өр-яңа, бер-ике көндә бу басуны чәчеп тә куячакбыз.
Борчакның да яңа сортын алган ленинлылар. Быел алар “нарат” дип аталган югары уңыш вәгъдә итүче сорт чәчә. Баш агроном әйтүенчә, 1540 гектар биләүче уҗым культуралары яхшы кышлаган. Бу мәйданның яртысын диярлек — уҗым бодае, 750 гектарын уҗым арышы, 40 гектарын тритикале алып тора. Ә менә сабанашлык — 1200, борчак — 700, арпа —1470, көнбагыш — 700, карабодай 295 гектарда үстереләчәк. 730 гектарга чәчеләчәк кукурузның 100 гектары орлыкка игеләчәк.
— Ун миллион сумлык орлыклар сатып алдык, минераль ашламаларны, былтыргыга караганда, ике тапкыр күбрәк алдык. Үсемлек­ләрне корткычлардан һәм чүп үләннәреннән саклау максатында 16 миллион сумлык препаратлар кайтартылды, — диде баш агроном. — Чәчүдә дүрт агрегат катнашачак. Быел ике яңа чәчкеч, куәтле К-700 тракторы, ике яңа тырма алдык. Әлеге тырмаларның һәркайсы бер үткәндә 24 метр араны эшкәртә, көненә 300 гектар басуны тырмата. Бүген-иртәгә “Кузбасс” чәчү агрегаты да кайтып җитәчәк.
Чәчүне “Ленин” хуҗалы­гының алдынгы механизаторы, хезмәттәге күрсәткечләре өчен былтыр җиңел машина белән бүләкләнгән Венер Әхиярет­динов башлап җибәрде.
— “Ленин” хуҗалыгына караган Юкәлекүл авылы егете мин, токымчылык заводында өч дистә елдан артыграк хезмәт салам, — дип уртаклашты Венер Мөхәммәт­фатыйх улы. — Хуҗалыгыбыз ида­рәсе намуслы игенчеләрен, тер­лекчеләрен күрә белә, лаеклы хез­мәт хакы түли, шуңа күңел күтәрен­келеге белән эшлибез.
Бу көнне районның тагын бер маягы – Хәниф Вәлиев исемендәге хуҗалык игенчеләре дә язгы чәчү кампаниясен башлады. Басу ба­тырларының барысына да уңышлар телибез!