Җир эшендә чын арыслан Арслановлар!

Миңле авылында гаилә­дә җиденче бала булып дөньяга аваз салган Рафаэль Фәнәви улы бу хуҗа­лыкны 1993 елда оештыра. 50 гектар гына басу алып, ашлык чәчеп, үз эшен башлаган фермер акрынлап җир мәйданын арттыра. Борай районының Ваныш авылындагы элекке Киров исемендәге колхоз биләмә­ләрен алып, малчылык тармагы белән дә шөгыльләнә башлый.
Рафаэль Арсланов урта белем алганнан соң Нефтекамада механизатор һө­нәрен үзләштерә, аннары армия сафына алына. Хәр­би бурычын үтәгәндә БАМ төзелешендә катнаша. Армиядән кайткач, Киров исемендәге колхозда тракторчы булып эшли башлый. Ваныш авылы сылуы Римма белән гаилә коралар.
Тик язмыш җилләре аларны, туган авылларыннан аерып, Свердловск өлкәсенә алып ки­тә. Яңа урында тор­мыш корып җи­бәрү бер дә җиңел булмый. Тик тырышкан – ташка ка­дак каккан, ди­ләр. Анда ул дүрт ел чамасы кошчылык фабрикасында эшли. Дөнья­лары түгәрәкләнеп, эш урыны да, фатиры да булгач, аның авылда калган әнисе кинәт авырып китә.
Безнең халыкта борын-борыннан шулай бит: ата-ана картайган көнендә өме­тен төпчек малайга баглый. Рафаэль Фәнәви улы да гаи­ләсе белән туган авылына әйлә­неп кайта. Менә шуннан бирле Арслановлар Миңле авылында гомер кичерә. Рафаэль Фәнәви улының тормыш юлдашы Римма ханым авылда башлангыч сыйныфлар укытучысы булып эшли, өч дистә елдан артык бианасы белән чөкердәшеп яши.
Арслановлар гаилә­сен­дә бер-бер артлы туган ике кыз хәзер инде үзал­лы тормыш корган, яратып сайлаган һөнәрләре буенча намуслы хезмәт сала. Уллары Раил — әтисенең уң кулы, зур ярдәмчесе. Бү­ген Рафаэль Арсланов­ның хуҗалыгы икътисади яктан тотрыклы. Фермер 2300 гектар җирдә бөртек­ле культуралар үстерә, терлекчелек белән дә шөгыль­ләнә.
— Туган якның һавасы да җанга шифа, тәнгә көч бирә, — ди ул. — Киләчә­гем­не авылымнан, киң басулардан башка күз алдына да китерә алмыйм хәзер.

Гөлназ Хуҗина.
Борай районы.

Фото: Гөлназ Хуҗина