+22 °С
Яңгыр
Авыл хуҗалыгы
15 декабрь 2021, 08:12
Җитештерәләр дә, эшкәртеп саталар да!
Терлекчелек өлкәсендә ныклы адымнар ясаучы Идрисовлар киләчәктә үз продукциясен республика күләмендә дә таныту максатын куя.Кушнаренко районының Иске Кормаш авылында гомер кичерүче Венера һәм Вадим Идрисовларның гаиләсе — күпләргә үрнәк. Яшь булуларына карамастан, алар авылдашларының ихтирамын яулап өлгергән, һәркемгә ярдәмчел, гөрләтеп дөнья көтүче фермерлар.
Җитештерәләр дә, эшкәртеп саталар да!
Идрисовлар белән Кушнаренко районына чираттагы эш сәфәребез вакытында таныштык, чын татар хатын-кызларына хас булганча, ачык йөзле Венера Венер кызы безне, ай-ваебызга карамый, чәй табыны артына утыртты, үзе пешергән тәбикмәк, вак бәлешләр белән сыйламый җибәрмәде. Әңгәмәбез дә тиз ялганды.
– Мин Кушнаренко районының Якуп авылы кызы, – дип уртаклашты ул. – Моннан 18 ел элек Иске Кормаш егете Вадим Харис улына кияүгә чыктым. Ул һөнәре буенча – водитель, мин – укытучы, Башкорт дәүләт университетының физика-математика факультетын тәмамладым. Ирем һәрчак үз эшен булдыру турында хыялланды. Ниһаять, моннан 8 ел элек әлеге хыялны чынбарлыкка әйләндерергә вакыт җитте дигән уртак карарга килдек. “Бу тормышта уңышка ирешкән һәр ир-егет артында хатын-кыз тора”, диләр бит, мин дә тормыш юлдашым белән бергә шәхси эшкуарлык йөген тартырга алындым. Һәм моңа һич кенә дә үкенмим.
Венера Венер кызы бәян итүенчә, Вадимның гаиләсе электән ат асраган, шуңа күрә ул да үз эшен нәкъ менә елкычылык тармагында башларга ният кылган. Берничә ел эчендә Идрисовлар маллар санын 30 башка җиткергән. Атлар өчен абзар, утар төзегән. Җиргә килгәндә, йортлары янындагы 30 сутый янына, үзләренең һәм әти-әниләренең пай җирләреннән файдаланалар. Венераның әтисенең үз тракторы бар, ул да яшь фермерларга зур ярдәм күрсәтә, ел саен печән хәзерләшә.
– Әтием – районның данлыклы алдынгы комбайнчысы, әнием гомер буе хисапчы булып хезмәт салды. Күмәк хуҗалык таралып, эш урыннары калмагач, күпләп мал-туар асрап дөнья көтәләр, алар җитештергән сөт, каймак, катык, эремчек, майны да халык чират торып алып бетерә, – ди Венера.
– Ат итен шул килеш тә, казылык эшләп тә сатабыз, – ди Вадим Харис улы. – Бу продукциягә ихтыяҗ бар. Аны сатар өчен Кушнаренко район үзәгендә үз кибетебезне төзедек. Сату эшен Венера алып бара.
Идрисовлар тавык, үрдәк, казны да күпләп үстерәләр. Әйткәндәй, ел саен алар зурлап каз өмәсе үткәрә. Кош-корт итен дә халык бик яратып ала икән.
Без сөйләшеп утырганда Идрисовларга йомыш белән күршеләре Гүзәлия Гайсина килеп керде һәм аларның портретларын тагын да чагурак буяулар белән баетты.
– Күршеләрдән уңдым, – диде Иске Кормаш авылының модельле китапханәсе хезмәткәре, хатын-кызлар оешмасы җитәкчесе Гүзәлия ханым зур канәгатьлек белән. – Яшь булуларына карамастан, бик зирәкләр, ярдәмчелләр, кечелеклеләр! Балалары да, үзләренә охшап, искиткеч тырышлар. Илнарага – 15 яшь, ул 9нчы сыйныфта укый, Илдарга – 13 яшь. Яхшы укулары өстенә, мәктәптә, авылда үткәрелгән барлык мәдәни чараларның йөзек кашы алар, моңлы итеп җырлыйлар, өздереп бииләр. Төрле чаралар оештырганда мондый сәләтле балалар – минем уң кулым. Төпчекләре Тимурга 5 яшь, ул балалар бакчасына йөри.
Өч яшеннән атка атланган Илдар – бүген әтисенең горурлыгы. Ул үзенең иң яраткан чабышкысы “Сухарь” белән ел саен сабантуйларда катнашып, күркәм җиңүләр яулый, “Терра-Башкирия”дә дә уңышлы чыгыш ясый. Киләчәктә фермер булачакмын, әти-әни эшен дәвам итәчәкмен, ди ул.
Уңганлык, эшсөярлек геннардан килә, күрәсең. Идрисовларның барлык туган-тумачалары да җиң сызганып эшли һәм мул тормышта яши. Мисал өчен, Венераның энесе Ирек район үзәгендә төпләнгән, тормыш юлдашы белән шәхси хуҗалыгында күпләп мал-туар, кош-корт асрый, апасына һәм җизнәсенә дә даими ярдәмләшергә вакыт таба. Ул да җәмәгате белән өч бала тәрбияли. Вадимның апасы Рәсимәнең гаиләсе дә авыл тормышын үз иткән, алар ел саен 200 баштан артык каз үстерә.
– Ике яклап та әти-әниләребезгә чиксез рәхмәтлебез: алар безне хезмәт сөяргә өйрәтеп үстерде, тормыш диңгезендә кыйблабызны югалтмаслык рухи кыйммәтләр салды күңелебезгә, – ди Идрисовлар. – Без дә балаларыбызны шушы үрнәктә тәрбияләргә омтылабыз.
Вадим һәм Венераның киләчәккә максатлары анык: хуҗалыкларын тагын да үстереп, җитештергән продукцияне республика күләмендә брендка әйләндерү. Яңа ел аларга яңа уңышлар алып килүен телибез!
Миләүшә Латыйпова,
“Кызыл таң”ның үз хәбәрчесе.
Кушнаренко районы.
– Мин Кушнаренко районының Якуп авылы кызы, – дип уртаклашты ул. – Моннан 18 ел элек Иске Кормаш егете Вадим Харис улына кияүгә чыктым. Ул һөнәре буенча – водитель, мин – укытучы, Башкорт дәүләт университетының физика-математика факультетын тәмамладым. Ирем һәрчак үз эшен булдыру турында хыялланды. Ниһаять, моннан 8 ел элек әлеге хыялны чынбарлыкка әйләндерергә вакыт җитте дигән уртак карарга килдек. “Бу тормышта уңышка ирешкән һәр ир-егет артында хатын-кыз тора”, диләр бит, мин дә тормыш юлдашым белән бергә шәхси эшкуарлык йөген тартырга алындым. Һәм моңа һич кенә дә үкенмим.
Венера Венер кызы бәян итүенчә, Вадимның гаиләсе электән ат асраган, шуңа күрә ул да үз эшен нәкъ менә елкычылык тармагында башларга ният кылган. Берничә ел эчендә Идрисовлар маллар санын 30 башка җиткергән. Атлар өчен абзар, утар төзегән. Җиргә килгәндә, йортлары янындагы 30 сутый янына, үзләренең һәм әти-әниләренең пай җирләреннән файдаланалар. Венераның әтисенең үз тракторы бар, ул да яшь фермерларга зур ярдәм күрсәтә, ел саен печән хәзерләшә.
– Әтием – районның данлыклы алдынгы комбайнчысы, әнием гомер буе хисапчы булып хезмәт салды. Күмәк хуҗалык таралып, эш урыннары калмагач, күпләп мал-туар асрап дөнья көтәләр, алар җитештергән сөт, каймак, катык, эремчек, майны да халык чират торып алып бетерә, – ди Венера.
– Ат итен шул килеш тә, казылык эшләп тә сатабыз, – ди Вадим Харис улы. – Бу продукциягә ихтыяҗ бар. Аны сатар өчен Кушнаренко район үзәгендә үз кибетебезне төзедек. Сату эшен Венера алып бара.
Идрисовлар тавык, үрдәк, казны да күпләп үстерәләр. Әйткәндәй, ел саен алар зурлап каз өмәсе үткәрә. Кош-корт итен дә халык бик яратып ала икән.
Без сөйләшеп утырганда Идрисовларга йомыш белән күршеләре Гүзәлия Гайсина килеп керде һәм аларның портретларын тагын да чагурак буяулар белән баетты.
– Күршеләрдән уңдым, – диде Иске Кормаш авылының модельле китапханәсе хезмәткәре, хатын-кызлар оешмасы җитәкчесе Гүзәлия ханым зур канәгатьлек белән. – Яшь булуларына карамастан, бик зирәкләр, ярдәмчелләр, кечелеклеләр! Балалары да, үзләренә охшап, искиткеч тырышлар. Илнарага – 15 яшь, ул 9нчы сыйныфта укый, Илдарга – 13 яшь. Яхшы укулары өстенә, мәктәптә, авылда үткәрелгән барлык мәдәни чараларның йөзек кашы алар, моңлы итеп җырлыйлар, өздереп бииләр. Төрле чаралар оештырганда мондый сәләтле балалар – минем уң кулым. Төпчекләре Тимурга 5 яшь, ул балалар бакчасына йөри.
Өч яшеннән атка атланган Илдар – бүген әтисенең горурлыгы. Ул үзенең иң яраткан чабышкысы “Сухарь” белән ел саен сабантуйларда катнашып, күркәм җиңүләр яулый, “Терра-Башкирия”дә дә уңышлы чыгыш ясый. Киләчәктә фермер булачакмын, әти-әни эшен дәвам итәчәкмен, ди ул.
Уңганлык, эшсөярлек геннардан килә, күрәсең. Идрисовларның барлык туган-тумачалары да җиң сызганып эшли һәм мул тормышта яши. Мисал өчен, Венераның энесе Ирек район үзәгендә төпләнгән, тормыш юлдашы белән шәхси хуҗалыгында күпләп мал-туар, кош-корт асрый, апасына һәм җизнәсенә дә даими ярдәмләшергә вакыт таба. Ул да җәмәгате белән өч бала тәрбияли. Вадимның апасы Рәсимәнең гаиләсе дә авыл тормышын үз иткән, алар ел саен 200 баштан артык каз үстерә.
– Ике яклап та әти-әниләребезгә чиксез рәхмәтлебез: алар безне хезмәт сөяргә өйрәтеп үстерде, тормыш диңгезендә кыйблабызны югалтмаслык рухи кыйммәтләр салды күңелебезгә, – ди Идрисовлар. – Без дә балаларыбызны шушы үрнәктә тәрбияләргә омтылабыз.
Вадим һәм Венераның киләчәккә максатлары анык: хуҗалыкларын тагын да үстереп, җитештергән продукцияне республика күләмендә брендка әйләндерү. Яңа ел аларга яңа уңышлар алып килүен телибез!
Миләүшә Латыйпова,
“Кызыл таң”ның үз хәбәрчесе.
Кушнаренко районы.
Фото: Идрисовлар архивыннан
