+21 °С
Болытлы
Авыл хуҗалыгы
25 февраль 2022, 08:10
Ишембай умартачылары нинди ярдәм алачак?
Ишембай умартачыларына дәүләт ярдәме чаралары турында сөйләделәр.
Ишембай умартачылары нинди ярдәм алачак?
Ишембай районы умартачылары өчен семинар үткәрделәр, анда бал җитештерү буенча үз бизнесын үстерүгә 350 меңнән алып 8 миллион сумга кадәр дәүләт субсидияләрен ничек алырга мөмкин булуы турында сөйләделәр. Урындагы умартачыларның Франция эшкуары Патрик Хоффман тарафыннан гамәлгә ашырыла торган инвестицион проектка карата сораулары килеп чыкканнан соң, вице-премьер Азат Бадранов умартачыларга мондый чара уздыру турында вәгъдә бирде.
Чараның төп спикерлары - Башкортстан Авыл хуҗалыгы консультацияләр үзәге директоры урынбасары Әлфия Гәрәйшина, умартачылык һәм апитерапия буенча башкорт фәнни тикшеренү үзәге киңәшчесе Рөстәм Резбаев.
Дәүләт ярдәме чаралары турында Әлфия Гәрәйшина сөйләде. Аның сүзләренә караганда, республиканың авыл хуҗалыгы товар җитештерүчеләре өчен нәтиҗәле программалар бар. Мәсәлән, "Агростартап" – башлангыч бизнес булдырырга һәм аннары үсәргә теләгән кешеләр өчен.
Яки «Гаилә фермасы» программасы аграрийларның үз җирендә ике елдан да ким эшләгән һәм якыннарын уртак хезмәткә җәлеп итә ала торган очраклар өчен. Өченче ярдәм чарасы - тиешле документлар һәм хисаплар биргәндә чимал һәм җиһазлар сатып алуга квартал саен субсидия ала торган кооперативлар.
Әлфия Мәүлетовна сүзләренә караганда, кече һәм урта эшкуарлык субъекты буларак (әйтик, кооператив) теркәлеп, үз продукцияңне сату (сәүдә вәкилләре белән килешү) һәм продукцияне сертификатлау җиңелрәк.
– Безнең институт республиканың Авыл хуҗалыгы министрлыгы вәкиле булып тора, - дип хәбәр итте Рөстәм Резбаев. - Без аграр университет һәм умартачылык проблемаларына бәйле башка фәнни ведомстволар белән хезмәттәшлек итәбез. Әлбәттә, урындагы халыкка консультация-мәгълүмат ягыннан да ярдәм итәчәкбез. Әйтик, килешүләр нигезендә умарта кортларының нәселен бәяләүдә башка мәсьәләләрдә дә ярдәм итә алабыз.
Башкорт бал кортларын саклауга килгәндә, Рөстәм Резбаев сүзләренчә, хәзерге вакытта аны саклау буенча конкрет проект эшләнә.
- Килеп туган хәл безне бу процессны тизләтүгә этәрә. Макаровка авыл биләмәсендә яшәүчеләр, Франциядән инвесторлар килү урындагы умарталарга бәйле хәлне начарайта, дип саный. Әмма республика хакимияте бу мәсьәлә хәл ителсен өчен күп эш башкара – барысын да канәгатьләндерерлек компромисс эзли торган эшче төркем булдырылган. Без, үз чиратыбызда, башкорт умарта кортлары гына үрчетелә торган территорияләрне төзүне тулысынча үз өстебезгә ала алабыз. Башкортстан территориясендә Иглин һәм Яңавыл районнарында мондый зоналарның мисаллары бар инде, - дип өстәде Резбаев.
Исегезгә төшерәбез, инвестицион проектны тормышка ашыру белән килеп туган мәсьәләләрне җайга салу өчен хакимият һәм урындагы халык арасында Ишембай районы умартачылары җәмгыяте булдыру турында килештеләр. Моннан тыш, эш төркеме дә булдырылды, ул очрашу вакытында урындагы халык күтәргән проблемаларны хәл итү белән дә, инвестор белән хезмәттәшлек буенча да шөгыльләнәчәк.
Фото: Башинформ.
