Ашлыгы да, шикәре дә мул булыр!

Гомумән, хуҗалыкның чә­чүлекләр структурасында тө­бәктә игелүче барча культуралар да урын алган, дип әй­тергә мөмкин. Карабодайны быел йөз гектарда үстермәк­челәр. Былтырдан чәчү әйлә­нешендә җитен ныклы урын алды. Быел исә аны 200 гектарга җиткергәннәр. Хуҗалык җитәкчесе бу культураны бик тә файдалы дип исәпли. Бе­ренчедән, былтыр хакы югары булды – тоннасы 60 мең сумнан артты, икенчедән, җитен­не авыл тирәсендәге басуларга чәчү бигрәк тә отышлы, чөнки аның үсентеләрен мал ашамый, димәк, басуларга зыян килми. Янә табышлы культураларның иң ышаныч­лысы – көнбагыш. Аңа хак югары һәм тотрыклы, шуңа да быел ул 380 гектарда үсте­реләчәк.
Шикәр чөгендере — “Кыдаш” басуларын күптән үз ит­кән культура. Элекке елларда “татлы тамыр” 500 гектардан артыграк мәйданда үстерел­гән, эшкәртүдә кул көче өстен­лек алса да, уңыш зур була, аерым елларда гектардан 400-500 центнер бирә. Мул уңыш үстереп, “Кыдаш”­ның чөген­дерче-механизаторлары районда һәм республикада киң танылу ала.
Хуҗалыкта техника паркы даими яңартылып тора, шуңа да кыр эшләре оешкан төстә башкарылган. Үткән елда, мәсәлән, “Джон Дир” чәчү комплексы алынган, заманча аг­регат басу эшлә­рендә хәлит­кеч көчкә әверел­гән, мәйдан­нарның бер мең гектары аның ярдәмендә чәчелгән.
Ә соңгы сызма культуралардан кукуруз чәчү хуҗа­лык­та бу өлкәдә зур эш тәҗри­бәсе булган механизаторларга тапшырылган. Әсгать Кашапов һәм Илдар Мөфтахов — нәкъ шундыйлардан, алар барча сызма культураларны игүгә махсуслашкан бел­гечләр. Чәчкеч агрегаты машинисты Рамил Дәүләтов һәм КамАЗ шоферы Зиннур Әдел­гә­рәев басу эшләрендә шулай ук зур тырышлык сала.
Механизаторлар чәчүлек­ләрне тәрбияләүгә дә кереш­кән. Ике Руслан – Гәрәев һәм Әхмәтшин махсус агрегатта химик утау алып бара, без хуҗалыкта булганда бу эшне алар 200 гектарда башкарган да иде инде. Гомумән, механизаторларга мәшәкать арта. Мал азыгы хәзерләү агрегатлары печән чорына әзерләп куелган. Быелгы яңгырның файдасы зур булды, болыннарда үлән күзгә күренеп күтә­релде. Тоташ алганда, күпьел­лык үләннәр 30 гектарны били, янә дә судан үләненә өметләр зур.
Хуҗалыкта маллар ишле, сыерлар һәм башмаклар, мәсәлән, 600 баш тирәсе. Өч сөтчелек фермасындагы тер­лекләр май башында җәйләү­ләргә чыгарылган. Яшел үлән­гә күчү белән савымның артуы да күзәтелә, тәүлегенә бер сыерга 15-20 килограмм сөт савып алына. Хәзерге чорда эшкәртү­челәргә көненә 5 тонна сөт озатыла.

Фәнүр Гыйльманов,
“Кызыл таң”ның үз хәбәрчесе.
Бүздәк районы.