Шикәр чөгендерен күпләп үстерәчәкбез

Елның һава шартлары бөртекле культураларга карата бик уңай булды, ә менә татлы тамырга августта яңгырлар җитмәсә дә, шикәр чөгендере уңышына да яхшы өметләр баглыйбыз, - диде республика Хөкүмәте Премьер-министры урынбасары, авыл хуҗалыгы министры Илшат Фазрахманов «Нерал-Чишмә» авыл хуҗалыгы предприятиесе базасында узган республика чөгендер игүчеләренең киңәшмәсендә.

- Быел 44 мең гектар чөгендер чәчтек, бу былтыргыдан 8 мең гектарга күбрәк, - диде ул. Шуңа күрә былтыргыдан күбрәк уңыш көтәбез, әлегә 1,6 миллион тоннага якын уңыш алдык, узган елда 1 миллион тоннадан кимрәк иде. Шикәр дә, узган елдагыга караганда, бер ярым тапкырдан күбрәк булыр, дип планлаштырабыз. Шуңа күрә без республиканың ике шикәр заводын чимал белән җитәрлек тәэмин итәчәкбез. Ике завод та модернизацияләнгән, хәзер чөгендерне шактый күбрәк эшкәртә алалар. Хәзер төп сорау - кайчан казый башлыйбыз, тамыразыкны ташу өчен машиналарны ничек бүләчәкбез? Сүз уңаеннан, бөртекле һәм майлы культураларга бәяләр төшүне күз уңында тотканда, шикәр чөгендере быел бик югары рентабельле культураларның берсенә әверелергә мөмкин, - диде ул.

Илшат Фазрахманов, яз көне шикәр чөгендере орлыклары буенча борчылулар булды, әмма бу проблема хәл ителде. Шуңа күрә әлеге катлаулы, әмма югары рентабельле культура мәйданын алга таба да 50 мең гектарга кадәр арттырырга дигән төгәл план бар.