Ихата түгел, парк бу!

Чакмагыш авыл биләмәсе хакимияте белгече Альбина Хаҗгалиева сүзләренә караганда, конкур­с­ның һәр катнашучысын җиңүче дип әйтергә була. Җиңүчеләрне билге­ләгәндә жюри составы иң тәүдә аеруча урам ягы, ихата алды бизәлешенә игътибар иткән.
— Аларның һәрберсенең дә йорт алды матур, үзен­чәлекле итеп бизәлгән. Райондашларыбызны киләчәктә дә мондый конкурсларда катнашырга, активрак булырга чакырабыз, – диде ул.
Җиңүчеләр билгеле булгач, чараны оештыручылар белән бергә Сәет­гәрәев­ларның йорт хуҗалыгы белән якыннанрак танышырга булдык. Әлбәттә, иң беренче чиратта күзләр матурлыкка төшә. Миңа калса, алар турыннан үткән бер кеше дә мондагы пөхтәлеккә, үзенчәлекле дизайн, зәвык белән тудырылган гүзәллеккә сокланмый кала алмыйдыр. Бу күркәм йорт күзнең явын алып, тирә-якны ямьләндереп, әллә кайдан игътибарны җәлеп итеп тора. Анда бер генә артык әйбер дә күр­мәссең. Тырыш район­даш­лары­бызның хуҗалыгын кечкенә ял паркы белән чагыштыру бер дә артык булмас кебек. Тирә-як шау чәчәккә күмелеп утыра, төрле декоратив үсемлекләр дә, агачлар да бар анда.
– Чәчәкләр тәрбия ярата. Февраль-март айларында ук үсентеләр орлыгы чәчә башлыйбыз, апрель азакларында, май башларында бакчага чыгарып утыртабыз. Мин үсен­теләр үстерәм, ә иптәшем җәй буе аларны су сибеп тәр­бияли. Мин башка эшләр белән кайнашам, теплицада, бакчада түтәлләр белән мәш киләм... – ди Зөфәр абый.
Сәетгәрәевлар, хаклы ялга чыккач, Себер тарафларыннан кайтып, биредә өй сатып алып, тормыш көтә башлаган. Әйе, бергә тырышканда, хез­мәт яратканда, бер-береңә терәк булып, ярдәмләшеп яшә­гәндә генә шундый күркәм нәтиҗәләргә ирешеп буладыр ул.
– Эшне яратабыз. 35 ел Себердә тормыш көтеп кайттык. Анда да үз йортыбыз белән яшәдек. Күбесе безнең йорт янында фотосессияләр оештыра иде. Менә бу каминны да үз кулларым белән эшләдем. Туя да утыртам, аларны таныш-белешләргә, туганнарга бүләккә таратам, – ди Зөфәр абый.
– Себер якларында яшә­гәндә ихатабыз тагын да матуррак иде. Без чыгышыбыз белән Аблай авылыннан. Чакмагышка кайтып урнашуыбызга алты ел гына булса да, тырышып дөнья көтеп, гүзәл­леккә омтылып яшибез. Урамнан үтеп баручылар туктап, сокланып, әлеге матурлык янәшәсендә балаларын фотога төшерә. Оҗмах шушында икән, дип әйтүчеләр дә бар. Кешеләргә матурлык, шатлык өләшү безгә рәхәтлек, күңел күтәренкелеге бирә. Матурлыкны яратырга кирәк. Уң­ганлык та кирәк, әлбәттә. Үзебезгә дә рәхәт, килгән кешеләр, балалар да шат. Балалар-оныклар да авылга теләп кайта, китәселәре килми, – дип сүзгә кушылды Тәслимә апа.
Әлбәттә, авыл җирендә йорт-кура тирәсендәге эш, тавык чүпләсә дә, бетәрлек түгел. Сәетгәрәевлар, хаклы ялда булуга карамастан, кул кушырып утырмый, чәчәк­ләрдән тыш, бакчада яшелчә, җиләк-җимеш тә үстерәләр.
Кулларыннан гөлләр та­ма... Һәркем сокланырлык эшләр башкаручы, үз куллары белән гүзәллек тудыручы кешеләр турында әйтәләр бу сүзләрне. “Иң яхшы йорт алды ихатасы” конкурсында катнашучы барлык райондашларыбызга да туры килә бу сүзләр.

Илсөяр Гайсина.
Чакмагыш районы.