Авыл кадрлары мәктәптә әзерләнә

Бу җәһәттән шуны билге­ләү урынлы: тармактагы уңай үзгә­реш­­ләр төбәктә авыл ху­җа­лы­гында кадрлар мәсьә­лә­­сенең кис­кенләшүенә дә китерде. Ашлык нык уңган агымдагы елда бу аеруча нык сизелде. Алдагы чорда механизатор һәм терлекче­ләргә, гому­мән, аграр белгеч­ләр­гә кытлык булмасын өчен әлеге мәсьә­ләнең төбәктә көн үзәгенә басуы да шуннан.
Матур башлангычта тәҗ­рибә мәй­данчыгы итеп район үзәгендә урнашкан 2нче мәк­тәпнең сайлануы исә биредә элек тә һөнәри юнәлеш буенча эшчән­леккә максатлы караш булуына бәйле. Мәк­тәп белән танышканда чарада катнашучылар моңа янә бер кабат инанды. Махсуслашкан сыйныф бүлмә­сендә авыл хуҗалыгы әсбап­лары урнаш­ты­рылган, “Агросыйныф” проекты турында бай мәгълүмат бирелгән. Әйткән­дәй, башлангычны тормышка ашыруда турыдан-туры катнашучылар сыйфатында рес­публиканың Авыл хуҗа­лыгы, Мәга­риф һәм фән министрлыклары, шулай ук Башкорт дәүләт аграр университеты чыгыш ясый.
Махсуслашкан профильле агросыйныф ачылуга багышланган чарада катнашучы мәгариф хез­мәткәрләре һәм авыл хуҗалы­гы белгеч­ләре, эре аграр пред­прия­тиеләр җитәкчеләре белән бер­лектә “түгәрәк өстәл” оештырылды. Җанлы әңгәмә барышында районның агросә­нәгать комплексындагы проблемалардан кадрлар мәсьә­ләсе үзәк урынны алып торуы аңла­шыладыр. Сер түгел, соң­гы елларда чыгарылыш сыйныф укучылары һөнәр сайлаганда өстенлекне медицина, нефть тармагы бел­геч­­лекләренә бирә, ә шул ук вакытта авылга эшкә кайтырга атлыгып торучылар азайганнан-азая. Гомум төс алган әлеге проблеманы хәл итү максатында дәүләт тарафыннан чаралар, әлбәттә, кү­релә, әмма аларның нәтиҗәсе көтел­гәнчә түгел, һәрхәлдә, авыл хуҗалы­гын­да хәлне уңай якка үзгәртми. Мондый шартларда мәктәп укучыларына һөнәри юнәлеш бирүдә аграр тармак белгеч­лекләре алгы планда торырга тиеш, чөнки бу илдәге аграр сәясәт­кә нык бәйле. Моңа өстәп, хезмәт базарында авыл ху­җа­лыгы белгеч­ләренә, атап әйткәндә, механизаторларга һәм тер­лекчеләргә генә тү­гел, агрономнар, инженерлар, зоо­вет­бел­гечләргә дә их­тыяҗ зур. Балаларда әлеге һөнәрләргә омтылыш мәктәп елларында ук салына, дип билге­ләнде “тү­гәрәк өстәл”­дәге чыгышларда. Га­мәл­гә куелган “Агросыйныф” проекты кысаларында исә бишенче сыйныф уку­чылары профильле укытыла башлаячак.
Һөнәри юнәлеш бирү район чарасында респуб­лика­ның авыл хуҗалыгы министры урынбасары Ләлә Дәүләт­бае­ва, Әлшәй районы хакимияте башлыгы Дамир Мостафин, аның урынбасарлары Данир Әх­мәдишин, Айдар Солтангулов, районның мәга­риф бүлеге җитәкчесе Зи­лә Чупова, Мәгариф һәм фән ми­нистр­­лыгының әй­дәүче белгече Миләү­шә Нуретдинова, Аграр универ­ситетның һөнәри юнәлеш бирү секторы мөдире Алия Атажанова катнаштылар. Эшлекле чара барышында Ләлә Дәүләтбаева һәм Раевка авылы мәктәп­ләре директорлары, шулай ук Әлшәй райо­ны­ның әйдәү­че авыл хуҗалыгы пред­прия­тие­ләре җитәк­че­ләре белән үзара хезмәт­тәшлек турындагы килешүгә кул куелды. Аннары бишенче сыйныф укучыларын “Агросыйныф”ка кабул итү тантанасы үтте. Истәлекле вакыйга уңаеннан аларны чараның мәртәбәле кунаклары тәбрик­ләп, аграр тармак билгесе – яшел галстуклар такты.
— “Агросыйныф” проекты Әлшәй районында беренче тапкыр гына кулланыла, лә­кин аның уңай нәтиҗәләр би­рәчәгенә шик юк, — диде Лә­лә Дәү­ләтбаева. — Тоташ республикада исә хәзерге чорга аларның саны 65кә җитте. Бу юнәлештә эшнең дәвам итәчәгенә ныклы ышаныч бар, чөнки агросәнә­гатьтә соңгы чорда зур үзгә­решләр күзәтелә, мәсәлән, санлы технологияләр киң таралыш алды. Җитеш­терү куәт-ләре заманча корылмалар һәм алдынгы техника казанышлары белән җиһаз­ландырыла. Әлеге яңалык­ларга бәйле, авылда механикалаштыруны автоматлаштыру алыштыра, нәтиҗә­дә, эш процесслары җиңе­ләя, ә бу, иң беренче чиратта, яшьләрне җәлеп итә. Аннары фи­дакарь, намуслы хезмәтнең бәһасе дә артты, хәзер хезмәт хаклары югары. Әлеге үзгәрешләр яшьләрне дә җәлеп итә, шуңа да авыл хуҗалыгының килә­чәге якты, дип расларга нигез бар.
Авыл хуҗалыгы сыйныфларында белем алуның неч­кәлекләре турында җен­текле итеп аграр университет белгече Алия Атажанова сөй­ләде. Ул белдерүенчә, “Агросыйныф” махсус программасы профильле предметлардан химия һәм биологияне тирән­тен өйрә­нүгә юнәлтел­гән, ул янә дә үсем­лекчелек һәм терлекчелек, авыл хуҗа­лыгын механикалаштыру, авыл ху­җалыгы биотехноло­гияләре буенча бай мәгълүмат бирә. Шулай ук авылда эшкуар­лык белән шөгыльләнү, экология мәсьәлә­ләре алгы планга куела. Тоташ ал­ганда, авыл хуҗа­лыгы сый­ныфларының эшен оештыру күпь­яклы хез­мәттәшлеккә нигез­ләнә, белем бирүче укытучылар сыйфатында аграр уни­верситет галим­нәре чыгыш ясый, алдынгы тәҗрибә белән республика агро­сәнәгатенең кү­ренекле белгеч­ләре, эре пред­прия­тиеләр җитәк­челә­ре уртаклаша. Уку программасында Башкорт­станның әйдәү­че авыл хуҗалыгы пред­приятие­ләренә экскур­сияләр оештыру да карал­ган. Яхшы укучы балаларга стипендия түләнә. Гомумән, агро­сыйныфта алган белем укучыларга көндәлек тормышта да ярдәм итәчәк.
Аграр тармакны сайлаган укучыларга үзенең ихлас теләк­ләрен Әлшәй районы хакимияте башлыгы Дамир Мос­тафин да җиткерде.
— Бүген гамәлгә кертел­гән “Агросыйныф” проекты уңышлы, озайлы һәм нәти­җәле булыр, әмма иң мөһиме – тормышчанлыгын һәм нәтиҗәлелеген күрсә­тер, дип ышанам. Димәк, безнең аграр пред­приятиеләргә әзер­лекле кадрлар туплау буенча эш башланды. Шундый ук мах­сус сыйныфларны район­ның башка мәктәп­ләрендә дә булдыруны күздә тотабыз. Ягъ­ни район укучыларының зур гына өле­ше, авыл хуҗа­лыгына бәйле һөнәр сайлап, язмышын туган төбәге белән бәйләячәк. Монысы аеруча мөһим, чөнки әзерлекле белгеч­ләр туган ягында кала. Районы­бызның авыл хуҗа­лыгы тармагы­ның ышанычлы кулларда булуы төбәкнең киләчәге дә өметле икәнле­ген аңлата, — диде ул.
Максатлы программалар нигезендә оештырылган һө­нәри юнәлештәге сыйныфларга төбәк­нең аграр пред­прия­тие­ләре дә зур өметләр баглый. Ни өчен ди­гәндә, би­редә алар өчен дә бел­геч­ләр әзер­ләнә. Шуны күздә тотып, чара эшендә район­ның әй­­дәү­че пред­прия­тие­ләре җитәк­челәре бик тә актив катнашты. Эшкә җәлеп итү максатында байтак эшлекле тәкъ­дим­нәр яңгы­рады.

Айгөл Мөхәммәтдинова.