Үтерүче һаман җәзасын алмаган

17 августта Башкортстанда туган кызны көнчелек нигезендә 29 яшьлек программист Пурявирсингх Сундур үтерә. Ул җинаятьне таныган һәм полициягә кызның гәүдәсе кайда яшерелгәнен күрсәткән.

Тикшерү версиясе буенча, индус Зәлияне көнләшкән һәм аны үтерүне алдан планлаштырган, гәрчә кызның аның белән бернинди романтик мөнәсәбәтләре булмаса да. Ерткыч аны утраудагы кешесез урынга алып китә, анда аеруча шәфкатьсезлек белән аның җанын кыя. 21 августта Зәлиянең имгәнгән гәүдәсе табыла.

Август ахырында якташыбызның гәүдәсен Маврикий утравыннан Учалыга алып кайтып җирләделәр. Шушы көннәрдә аңа 30 яшь туласы булган. Аның туганнары Маврикийда үтерү турындагы эшне тикшерүнең шактый озакка сузылуына борчыла.

Зәлия Шамигулованың гаилә әгъзалары Маврикий Республикасындагы Русия консуллыгы белән даими элемтәдә тора, аның хезмәткәрләре көн саен диярлек урындагы полициягә тикшерү барышы турында запрослар җибәрә. Әмма дүрт ай узгач та нәтиҗәләр һаман юк әле, - дип яза "КП.Уфа.ру".

"Эшнең шулай озакка сузылуына без гаҗәпләнәбез. Бу бәндә гаебен таныды бит инде. Без социаль челтәрләрдә аның туганнарының ничек яшәвен күрәбез. Алар имин тормыш алып бара һәм күңел ача, ә без газап чигәбез. Безнең Зәлия акыллы, укымышлы, чибәр иде. Телләр белә иде, университетта эшләде, дөнья буйлап сәяхәт итте. Ә хәзер ул юк, ә җинаятьчегә һаман да җәза бирелмәгән. Ул бит кеше түгел", - ди кызның апасы.

Бүгенге көндә Зәлиянең әнисе Учалы мәктәбендә укытучы булып эшли. Физик яктан ул үзенең коллегалары һәм укучылары белән була, ләкин аның бөтен уйлары яраткан кызы турында. Ул аны үтергән ерткычның һаман да җәзага тарттырылмавы белән килешә алмый.

Зөлфия Шәмигулова кызын үтерүчене тиз арада һәм гадел хөкем итүгә ирешергә ярдәм итүчеләргә мөрәҗәгать итәргә карар кылган. Аларның гаиләсенә төшкән коточкыч фаҗига көненнән соң дүрт айдан артык вакыт узгач та, анага бөтен илдән кайгы уртаклашулар килә.

Хәзер Залиянең әнисе хыялланган бердәнбер нәрсә - аның кызын үтерүче өчен максималь катгый җәза. Ул Русиянең Маврикийдагы консуллыгына ярдәм өчен рәхмәт белдерә, ләкин аларның урындагы полицияне «кузгату» өчен тырышлыклары җитәрлек түгел, дип саный.

Фото: кп.ру