Кварталга – 50 үгез!

Һәрдаим алга карап эш итүче зур тәҗрибәле җитәкче, Башкортстанның атказанган авыл хуҗалыгы хезмәткәре Фәйрүз Галиев рәислегендәге Фрунзе исемендәге кооперативның үсемлекчелек өлкәсендәге мәртәбәле уңышлары турында үткән саннарның берсендә язган идек инде. Баксаң, һәр җәһәттән әйдәп баручы хуҗалыкның терлекчелек тармагындагы алдынгы эш тәҗрибәсен дә республика күләмендә үрнәк итеп куярлык.

— Соңгы елларда без сөт җитештерү белән бергә ит терлекчелеген үстерүгә дә ныклы юнәлеш алдык. Бүгенге көндә хуҗалык фермаларында 1260 баш сыер малы, шул исәптән 430 савым сыеры асрала. Сы­ер көтүен яңарту һәм аларның продуктлылыгын арттыру максатында 159 тана әзерләүгә куелган. Бу эш бездә даими алып барыла. Ит терлек­че­легенә килгәндә, бүгенге көндә 261 баш үгез симертүгә куел­ган. Аларны 18-24 ай эчендә 600 килограмм авырлыкка җит­кереп сатабыз. Квартал саен шушы авырлыкка җитке­релгән 50 баш үгез Туймазыдагы ит комбинатына җибә­­релеп тора. Шушы рәвеш­ле без комбинатны өзлексез рәвештә югары сыйфатлы ит белән тәэмин итсәк, хуҗалык казнасы даими нигездә тере акча белән тулылана. Бу үз чира­тында кооперативка үз акчалары исәбенә колачлы про­ект­ларны тормышка ашыру мөмкинлеге бирә. Әйтик, агымдагы ел башыннан гына хуҗа­лык икътисадына капитал са­лу­ларга 69 миллион сум юнәлттек. Әле симертүдә булган үгезләрне һәм сыер көтүен тулыландырачак таналарны алыштырырга янә дә 226 бозау үсеп килә. Кыскасы, терлек­челектә ике юнәлешне дә тигез үстерү безгә югары табыш алыр­га һәм икътисади нәти­җәлелеккә ире­шергә ярдәм итә, — диде тармакта эшләр торышы белән таныштырып, Фәй­рүз Галиев.

Һәм, әлбәттә инде, тармактагы югары казанышлар, хуҗа­лык җитәкчелеге тарафыннан үткәрелүче дөрес икътисади сәясәт белән бергә, тәү чиратта биредә көнне төнгә ялгап хез­мәт салучы фидакарь­ләрнең тырыш хезмәт нәтиҗәсе дә булып тора. Бу җәһәттән сөт җитештерүдә үз һөнәренең осталары булган савучылар На­талья Охрименко, Фәймә Хәбибуллина, Ләйсән Хәби­бул­лина, Любовь Данилова, көтүчеләр Марат Бохар­мәтов, Азат Бохармәтов, Илшат Әде­һәмов кебек фидакарьләр тырыш­лыгы белән югары ка­за­нышларга ирешелсә, малларны симертүдә хуҗалык җитәк­чесе Ринат Әбелхәеров белән Фәнил Насый­ровның намуслы хезмәтен мактап телгә алды. Ә инде тармакта һәр юнәлештә эшләрнең көйле баруын Ринат Кантимеров кебек оста оештыручылар тәэмин итә. Динес авылы фермасын ул менә инде чирек гасырдан артык шушы рәвешле үрнәкле итеп җитәкли.

Бүгенге көндә хуҗалыкта тәүлегенә 3 тонна чамасы сөт савып алына. Октябрь-ноябрьдә сыерлар бозаулап беткәннән соң, аның тагы да артуы көтелә. Гомумән, малларны уңышлы кышлату өчен хуҗалыкта бар да әзер. Куралар төзек, ул гына түгел, фермалар янына кадәр асфальт юл килә, бу җәһәттән, быел үз акчалары исәбенә Динес фермасы территориясен дә тулысынча асфальтлаганнар. Ә инде мал азыгын ике елга җитәрлек запас белән хәзерләү Фрунзе исемендәге кооперативта күптән күркәм гадәткә әве­релгән. Бер сүз белән, алдынгы хуҗалыкта продукция җитеш­терү күләмнәрен алга таба да арттыру өчен бөтен шартлар тудырылган!

Илдар Фазлетдинов.
Федоровка районы.