“Кызыл таң”ның йөзен ул билгели!

Гәзит-журнал редакцияләрендә секретариатны, хәрби телгә күчереп, “штаб” дип атау гадәте бар. Ә инде “штаб” эшендә төп звено булган гәзитне версткалау бүлеген “кайнар цех” дип атыйлар. Гасырларга сузылган тарихы булган матбугат даирәсендә редакцияләр эшендәге әлеге төп структураларга бу атамалар очраклы гына тагылмагандыр, шәт. Ни өчен дигәндә, беренчесендә басманың эш планы, ягъни аның эчтәлеге формалаштырылып, шул план буенча журналистлар әзерләгән материаллар тупланып, шулардан һәр яңа сан эшләнсә, версткалау бүлегендә исә әлеге материаллар, баш мөхәррир урынбасарлары тарафыннан мөхәррирләнеп, төзәтелгәннән соң, әзер продукция — типографиядә бастыруга җибәрелүче гәзит-журнал битләре рәвешен ала. Ә инде бу эшләрнең ни дәрәҗәдә “кызу” шартларда баруын матбугаттан ерак торган кешеләр дә аңлый торгандыр. Бер яклап көн кадагында булган хәл-вакыйгаларны яңа санга урнаштырып бетү таләп ителсә, икенче яктан, мотлак, җитәкчелек билгеләгән графикка да сыешырга кирәк, юкса, иртәгә таң белән абунәчеләр кулында булырга тиешле гәзит вакытында адресатка барып җитмәскә мөмкин. Ә бу инде дәүләт заказын вакытында үтәмәү, абунәчеләр алдындагы бурычны тиешле дәрәҗәдә башкармау дигән сүз.

Хәер, соңгы елларда почта гаебе, башка сәбәпләр белән, аерым очракларда һәм аерым район-авылларда гәзитләрнең бер атнага кадәр соңлап килү очраклары булса да, “Кызыл таң”ның 105 еллык тарихында редакция гаебе белән бер генә тапкыр да гәзитне соңлатуга юл куелмаган. Чөнки бездә, эш никадәр генә катлаулы һәм җаваплы булуга карамастан, йөкләтелгән бурычларны танктай сөреп баручы һәм мотлак ахыргы нәтиҗәгә җиткерүче үз һөнәренең осталары булган хезмәт батырлары эшли. Алар арасыннан компьютерда версткалау инженеры, бүген үзенең 55 яшьлек күркәм гомер бәйрәмен билгеләүче Гөлчәчәк Ирек кызы Миңне­баеваның әлеге вазыйфада хезмәт стажы утыз елдан артып китә. Һәм шушы вакыт эчендә “Кызыл таң”ның “кызу” цехында төрле елларда, төрле дә­верләрдә эшләп, бик күп ут-суларны кичеп чыныккан хезмәттәшебез, чын мәгънәсендә үзен эше белән дә, рухы белән дә, холык-фигыле белән дә гәзите­безнең алгы сафларында әйдәп баручы “танкы” итеп танытты. Алгы сафында диюем очраклы гына түгел. Әлеге вазыйфага эшкә килгәннән бирле, тәүге елларда чиратлашып, соңгы сигез елда исә берүзе, гәзитнең тәүге битләрен нәкъ ул версткалый. Ягъни бу очракта ул күпмедер дәрәҗәдә гәзитнең йөзен билгели дисәк тә арттыру булмастыр. Чөнки Гөлчәчәк Миңнебаева ничек версткалый — гәзитнең яңа саны шулай басылуга китә.

Монысы бер булса, һәр гәзитнең тәүге битләрендә төп рәсми материаллар урын алуын исәпкә алганда, Гөлчәчәк Ирек кызы иңнәренә никадәр җаваплылык салынуын да күзаллау авыр түгел­дер. Һәрхәлдә гәзи­тебез та­рихында бер хәрефтә, бер сүздә хата җибәрелеп, бик күп кеше­ләрнең башлары Себер киткән вакытлар да булган. Шөкер, әлегә кадәр үз эшен гаять зур җаваплылык, төгәллек белән башкаручы Гөлчәчәк Миңнебае­ва, рәхмәт, безнең башларны андый аянычлы язмыштан лаеклы рәвеш­тә як­лап һәм саклап килә. Алга таба да шулай булсын!
Ә җаваплылык һәм хата җи­бәрү ихтималлыгы чыннан да зур ул башкарган эштә. Әйтик, гәзитне төсле басмага күчергән елларда эш төнге уникеләргә кадәр сузыл­ган вакытлар да бар иде. Яисә Башкортстанга илнең беренче җитәк­челәре килгән вакытта да алар катнашлыгында көн дәвамында бул­ган барлык вакыйгаларны иртән дөнья күрәсе санга урнаштырып бетерү дә гадәти эш рәвеше. Иртә таңнан ярты төнгә кадәр компьютерга текәлеп утырган кеше бер генә өтер-ноктаны да, детальне дә күздән ычкындырмас өчен никадәр игътибарлы һәм җаваплы, барысын да вакытында һәм тиешле дәрәҗәдә башкарып чыгарлык чыдам булырга тиеш! Хөрмәтле хезмәттә­шебез Гөлчәчәк Миңнебаева нәкъ әнә шундый кеше дә инде!

1968 елда Миякә районының Чытырбаш авылында дөньяга кил­гән Гөлчәчәк Ирек кызының, гомумән, бөтен гомере матбугат белән бәйле дисәк тә хата булмастыр. Миякәдәге 2нче урта мәктәпне, аннан соң Уфа полиграфия училищесын тәмам­лау белән ул “Башкортостан” нәш­рия­тының хәреф җыю цехына, “Советская Башкирия” гәзите материалларын җыюга тәгаенләнгән линотипка эшкә билгеләнә. 1993 елда гәзит бастыру эше компьютерлаштырылгач, “Кызыл таң” гәзитенә эшкә чакырыла. Тәүдә хәреф җыючы оператор була, 2001 елдан бүгенге көнгәчә гәзитне компьютерда версткалау инженеры булып эшли. Шушы вакыт эчендә һәрдаим һөнәри осталыгын арттыру өстендә эшләүче тынгысыз хезмәттәшебез читтән торып Самарадагы полиграфистлар техникумын тәмамларга да өлгерде.

Ә бит бу еллар көчле рухлы Гөлчәчәк Миңне­бае­ваның шәхси тормышында да гадәти, тыныч кына булмады. “Кызу” цехта эшнең никадәр генә кы­зу булуына карамастан, тәүдә авыр чиргә тарыган әниләре Вәсимә апага туганнары Минзәлә һәм Илдус белән бергә тиешле тәрбия кылып, карап, мөмкин булганча дәвалап, үзләренең йөрә­геннән өзеп диярлек гомерен озайтырга тырыштылар. Сәгать суккач, шулай ук тәрбияләп, хөрмәтләп соңгы юлга озат­тылар. Сөекле тормыш иптәше вафатыннан соң әтиләре Ирек ага да биреште һәм берничә елдан урын өстенә калды. Бу очракта да туганнар бердәм рәвештә аңа тиешле тәрбия кылдылар. Гөлчәчәк ха­ным газиз кешесен үз гаиләсе янына алып килеп, биш ел дә­вамында урын өстендәге әтисен карады. Билгеле, аның ничек өзгәләнүләре дә, газиз кешесенең гомерен озайту хакына мөмкин бул­ганның барысын да эшләргә тырышуы да ба­рыбызның күз алдында булды. Бу җәһәттән, әти-әни кадере турында сүз алып барганда менә кемнән үрнәк алырга, кемгә йөз тотарга кирәк безнең барыбызга да! Һәр­хәлдә, иманым камил, Гөлчәчәк Миңнебаева ке­бек кешеләр күбрәк булганда иң авыр чиргә тарыган ата-аналар да соңгы йортына күңел тынычлыгында, бәхиллеген биреп күчәчәк, картлар йорты төшенчәсе исә бөтен­ләй онытылачак! Шушы урында, әлбәттә, гомеренең бик күп елларын хокук саклау органнарында эшкә багышлаган, әлеге вакытта торак-коммуналь хуҗалык системасында хезмәт салучы ире Фирдәвес Әхияр улының да гаять олы җанлы кеше, хәс­тәрлекле гаилә башлыгы булуын билге­ләргә ки­рәк. Күптән түгел сатып алган яңа фатирларында аларга алдагы көннәрдә дә туганнар, дуслар, якыннар белән тыгыз аралашып, бәхетле гомер кичерергә, тигез картаерга язсын дип кенә телисе килә.

Гөлчәчәк Миңнебаеваның “Кызыл таң” гәзи­тен­дәге өч дистә еллык фидакарь эшчәнлеге дәү­ләт тарафыннан да югары бәяләнде. Төрле елларда ул Башкорт­стан­ның Матбугат һәм киң­күләм мәгъ­лүмат чаралары агентлыгының, Ру­сия­нең Элемтә һәм киңкүләм коммуникацияләр министр­лыгының бүләкләре белән билгеләнде. Һәм, иманым камил, бүген дә гәзит эшен алга сөреп алып барган “Кызыл таң”ның верскалау остасының хез­мәтләре, һичшик­сез, тагы да юга­рырак бү­ләкләр белән дә билгеләнер дигән теләктә калыйк! Юбиле­егыз мөбарәк булсын, Гөлчәчәк ханым!

Илдар Фазлетдинов.
“Кызыл таң” гәзитенең җаваплы секретаре.