Барлык яңалыклар
Социаль өлкә
15 октябрь 2014, 22:19

Һәр сабый әти-әниле булырга тиеш!

Балага үз әти-әнисен кем алыштыра ала? Төрле социаль хезмәтләр, интернатлар, балалар йортларымы? Эчкән, сабыен карамаган, аны ачка интектергән, ялангач йөрткән гаиләдә этләнүгә караганда, аларда, әлбәттә, яхшырак. Ләкин хәзерге законнар балага бармак белән чирткәнне дә гафу итми, кем әйтмешли, бала ягына карап төчкергәнгә дә җинаять мәддәсе әзерләнеп куелган. Социаль хезмәтләр җиңел генә баланы ата-анадан аерып алып китә һәм соңгыларына, суд юлында йөреп, үзләренең әйбәтлеген исбат итәргә туры килә.

Бәлки шуңадыр да бүген балалар учреждениеләрендә тәрбияләнүчеләрнең 80 про­центы — әти-әниле килеш ятим. Соңгы елларда бу гаделсезлек төзәтелә башлады. Хәзер сабыйны гаиләдән аерырга түгел, ничек тә анда калдырырга тырышалар. Әйе, нинди генә җылы, якты бүлмәләр, тәмле ашлар белән кызык­тырмасыннар, үз өеңдәге тимер карават белән кыерчык ипигә, үз әти-әниеңә җитми шул.
Уфаның “Безнең балалар” хәйрия фонды баласыннан баш тарту яисә аннан колак кагу куркынычы булган социаль якланмаган гаиләнең хокукларын һәм ирекләрен яклау проектын нәкъ шушы максатта башлаган. Әлеге проект былтыр Русия Президенты Указына ярашлы үткәрелгән коммерция карамагында булмаган оешмаларга грантлар бүлү буенча Ачык конкурста катнашкан. Ул вакыт 1453 заявкадан 150се сайлап алынган иде. “Безнең балалар” фонды республикада ярдәм алган бердәнбер оешма булды. Проект 500 мең сум грант акчасына быел фев­раль­дән сентябрьгә кадәр гамәлгә ашырылган.