Благовещенда психоневрология интернаты төзекләндерелә

Учреждение хроник психик авырулары булган өлкән яшьтәге кешеләрне һәм инвалидларны тернәкләндерү белән шөгыльләнә. Интернат бөтен республикадан 400 кешегә хезмәт күрсәтә. Кайбер тәрбияләнүчеләр өлешчә, яки тулысынча үз-үзләрен хезмәтләндерү сәләтен югалткан һәм даими медицина тәрбиясенә мохтаҗ.

Яңа корпус төзелешен үткән елның гыйнварында "Демография" гомумдәүләт проекты кысаларында башладылар. Федераль һәм республика бюджетларыннан 408 миллион сум акча бүлеп бирелгән. Радий Хәбиров палаталарны, буфетны, ял итү зонасын һәм медицина постын карады, анда пультлардан һәм видеокамералардан бөтен мәгълүмат чыгарыла.

Интернат директоры Айдар Әюпов яңа корпустагы беренче катның аз хәрәкәтле кешеләрне урнаштыру өчен билгеләнгән булуы турында сөйләде, барлыгы бүлмәләрдә 24 кеше яши ала. Икенче катта 36 өлкән кеше урнашачак. Һәр бүлмә персоналны чакыру төймәсе һәм видеокүзәтү белән җиһазландырылган. Монда, шулай ук, процедура бүлмәләре һәм социаль адаптация кабинеты җиһазландырылган, анда яшәүчеләрне үзләре турында кайгыртырга өйрәтәчәкләр. Икенче катта, пациентларның теләкләрен исәпкә алып, гыйбадәт залы ачканнар.

Башкортстан Башлыгы яңа корпусның икенче чираты төзелешенә акча бүлеп бирүне йөкләде һәм республиканың социаль яклау учреждениеләрен модернизацияләүне дәвам итәчәген билгеләде.

- Республика социаль хезмәт күрсәтү өлкәсендәге барлык мәсьәләләрне әкренләп хәл итәчәк, - диде Радий Хәбиров. - Мондый учреждениеләрдә - безнең җәмгыятьтә иң яклаучысыз кешеләр. Һәм аларга, һичшиксез, ярдәм итәргә, нормаль шартлар булдырырга кирәк. Яңа корпус - дәвалау һәм яшәүнең ничек оештырылырга тиешлеге мисалы.