Медицина халыкка якыная

Кичә үткән Хөкүмәтнең атналык оператив киңәшмәсендә Башкортстан Башлыгы Радий Хәбиров кемгә Яңа ел бүләкләрен әзерли башлавы турында сөйләде. “Шимбә көнне үзебезнең проектны – “Теләкләр чыршысы” Бөтенрусия хәйрия акциясен ачтык. Мин инде балаларга бүләкләр әзерли башладым, Хөкүмәт әгъзаларыннан бу искиткеч тра­дициягә кушылуны сорыйм, Яңа елга кадәр без балаларга бүләкләрне тапшырырга тиеш”, –─ диде төбәк җитәкчесе.

Киңәшмәдә төбәк Башлыгы “Спорт – тормыш нормасы” проекты кысаларында республиканың дүрт спорт мәктәбе директорларына яңа автобус ачкычлары тапшырды. Автобусларга Бөре районының ─ “Буревестник”, Күмертау шәһәренең ─ “Сапсан”, Нефтекама шәһәре спорт мәктәпләре, шулай ук байдарка һәм каноэда ишү буенча Олимпия резервы спорт мәктәбе ия булды. “Республикада спортны үстерү юнәлешендәге проектлар һәм программалар бик күп. Безнең спорт мәктәбендә генә дә “Авыл тренеры” программасы кысаларында 6 тренерга берәр миллион сум акча бирелде. Шундый Яңа ел бүләге өчен рәхмәт белдерәбез. Бу автобус безнең спортчыларга яңа биеклекләргә ирешергә ярдәм итәчәк”, –─ диде “Сапсан” спорт мәктәбе директоры Ирина Медведева.

Башкортстанда 570 Яңа ел шәһәрчеге төзелә. Аларның күбесе инде ачылды, әмма кайбер муниципалитетларда эшләр һава торышына бәйле тоткарланды, дип хәбәр итте торак-коммуналь хуҗалык министры Ирина Голованова. Республикада барлыгы 1703 чыршы урнаштырылган, 347 шугалак, 633 таучык, 67 чаңгы базасы һәм 30 тюбинг трассасы эшли. Уфада 22 төп боз шәһәрчеге төзелгән, шуларның икесе – үзәк шәһәрчекләр: шәһәр Советында һәм Конгресс-холл янындагы мәйданда. Башкалада барлыгы 350 Яңа ел чыршысы куйдылар.

Киңәшмәдә Радий Хәбиров Иглин авылында тантаналы рәвештә “Олимп” физкультура-сәламәтләндерү комплексын ачты. Район башлыгы Гүзәл Насыйрова видеоэлемтә аша яңа спорт объекты турында сөйләде. “Бүген биредә спортчылар, тренерлар, төзүчеләр җыелды. Бөтен Иглин районыннан Башкортстан Хөкүмәтенә, республиканың Спорт министрлыгына зур рәхмәтебезне җиткерәбез. Безнең спорт комплексында футболчылар, волейболчылар, көрәшчеләр, боксчылар, гимнастлар һәм дзюдочылар шөгыльләнәчәк. Без республикага тагын бик күп җиңүләр китерәчәкбез. Барыгыз да спорт белән шөгыльләнегез!” ─ – диде ул.
Уфада сәламәтлек саклау учреждениеләрен модернизацияләү дәвам итә. Узган атнада Кузнецов Затоны бистәсендә “Доктор в доме” дәвалау учреждениесе ачылды. Бу хакта оператив киңәшмәдә сәламәтлек саклау министры Айрат Рәхмәтуллин хәбәр итте.

“Без медицина ярдәмен зур күпфатирлы йортларга якынайтабыз. Анда өлкән һәм яшь пациентлар медицина тикшерүе узсын өчен УЗИ, ЭКГ кабинетлары, тар белгечләр һәм башкалар бар. Кешеләр канәгать”, –─ диде Айрат Рәхмәтуллин. Ул билгеләп үтүенчә, Яңа ел каникулларыннан соң проект Уфада Кувыкин урамындагы күпфатирлы йортларның берсендә гамәлгә ашырылачак. Исегезгә төшерәбез, “Доктор в доме” пилот проекты шушы елның мартында Уфада старт алды. Яңалык участок педиатрлары һәм терапевтлары эшенең нәтиҗәлелеген арттыруга юнәлтелгән.

Башкортстанда 2025 елда республикада СВОда катнашучыларга һәм аларның гаилә әгъзаларына ярдәм итү елын гамәлгә ашыру буенча чаралар планы эшләнде һәм оештыру комитеты составы расланды. Гаилә, хезмәт һәм халыкны социаль яклау министрының беренче урынбасары Юрий Мельников белдерүенчә, ул махсус хәрби операциядә катнашучыларның һәм аларның гаиләләренең мәнфәгатьләрен кайгыртуга юнәлтелгән 99 чараны үз эченә ала. Тематик ел чараларын гамәлгә ашырганда төп басым муниципалитетларга ясалган. “Без республика һәм муниципаль дәрәҗәне колачларга, гыйнварда барыбыз да эшкә керешергә әзер булырга тиеш”, – диде республика җитәкчесе.