Производствода имгәнү очраклары кимегән

Гаилә, хезмәт һәм халыкны социаль яклау министры Ленара Иванова хезмәтне саклау өлкәсендәге эшнең төп юнәлешләре турында җентекле сөйләде, узган ел нәтиҗәләре буенча производствода имгәнүләр күрсәткечләрен җиткерде һәм хезмәт шартларын яхшырту буенча мөһим чараларны билгеләп үтте.

– Былтыр республика оешмаларында 32 хезмәткәр һәлак булды, ә 2023 елда – 36 һәлак булучы, – дип билгеләп үтте Ленара Иванова. - Шул рәвешле, үлем белән тәмамланган травматизм дәрәҗәсе 11%ка кимеде.

Узган елда икътисадның аеруча имгәнү куркынычы булган тармаклары: эшкәртү производстволары, файдалы казылмалар чыгару, төзелеш, транспорт һәм элемтә, авыл хуҗалыгы.

Ведомство җитәкчесе сүзләренә караганда, республикада зарарлы яки хәвефле хезмәт шартлары булган эш урыннарында 108 меңгә якын кеше эшли.

– Бу күрсәткеч Идел буе федераль округына һәм тулаем Русия белән чагыштырганда түбәнрәк, - дип хәбәр итте министр. - Безнең төбәктә зарарлы яки хәвефле хезмәт шартлары булган эш урыннарында кешеләр азрак җәлеп ителүе сөендерә.

Ленара Иванова һәр районда хезмәтне саклау буенча координацион советлар төзелүе, бәхетсезлек очракларын кисәтү буенча чаралар планы эшләнүе турында сөйләде.

Министр «Хезмәтне саклау өлкәсендә Башкортстан Республикасының иң яхшы муниципаль берәмлеге» исеменә республика конкурсы уздырылуын искәртте.

– Беренче урынны Дүртөйле районы алды, - диде Ленара Иванова. - Кызганычка каршы, 16 муниципалитет кына катнашты. Башкаларның кушылуын үтенәм. Шуны да искәртәсем килә: 1 апрельдән ел саен үткәрелә торган республика хезмәтне саклау айлыгы башланды, аның максаты - урыннарда хезмәт шартларын яхшырту һәм хезмәтне саклау буенча эшне камилләштерү.

Доклад йомгаклары буенча Башкортстан Хөкүмәте Премьер-министры Андрей Назаров муниципаль районнар һәм шәһәр округлары администрацияләренә, Гаилә, хезмәт һәм халыкны социаль яклау министрлыгына һәм предприятиеләргә хезмәткәрләрнең хезмәт шартларына игътибарны арттырырга кушты.

– Шулай ук эш бирүчеләргә җитештерү травматизмын һәм һөнәри авыруларны киметү буенча кисәтү чараларын тәэмин итүне финанслау программасына керергә кирәк, – дип ассызыклады Хөкүмәт Премьер-министры.