Ярлылыкны киметүнең бер юлы - социаль контракт

- 2023 ел белән чагыштырганда, ярлылык дәрәҗәсенең кимүе 1,7 процент пункты - 7,8% тәшкил итте. Бер ел элек республикада яшәүчеләрнең 9,5%ы яшәү минимумыннан түбән керемгә ия булган, - диде Башкортстанның гаилә, хезмәт һәм халыкны социаль яклау министры Ленара Иванова.

Башкортстан халкының тормыш дәрәҗәсен күтәрүгә, министр сүзләренчә, хезмәт хакларын арттыру, эшкуарлык эшчәнлегеннән керемнәрне арттыру хисабына халыкның керемнәре арту йогынты ясады. Ярлылыкны бетерүдә нәтиҗәле механизмнарның берсе - социаль контракт нигезендә адреслы социаль ярдәм. Республикада ул 2020 елдан бирле гамәлгә ашырыла.

- Ел саен 3500дән артык гаилә социаль контракт төзегәндә айлык яки бер тапкыр бирелә торган түләүләр рәвешендә ярдәм ала һәм керемнәрнең яңа чыганакларын формалаштыра. 2024 елда гомум суммасы 675 млн сумнан артыграк булган 3450 контракт төзелгән. Республикада яшәүче 1 меңнән артык кеше бу программада катнашып яңа эш тапты, 1200дән артык кеше үз эшен ачты, 800дән артык гаилә шәхси хуҗалыклар ачты яки киңәйтте, ягъни дәүләт ярдәме белән үз гаиләләренең иминлеген арттыруга конкрет адымнар ясады, - диде министр.

2025 елда республика халкының эшкуарлык башлангычларына ярдәм итүгә, шулай ук социаль контракт нигезендә адреслы ярдәмнең башка юнәлешләрен гамәлгә ашыруга 718 млн сумнан артык акча юнәлтеләчәк. Бу социаль контрактны төзергә һәм 3800дән артык гаиләнең матди хәлен яхшыртырга мөмкинлек бирәчәк. Күпбалалы гаиләләр белән социаль контрактлар өстенлекле тәртиптә төзелә.

Ленара Иванова билгеләп үткәнчә, ярлылыкны киметүнең тагын бер механизмы 2026 елда балалары булган аз керемле гаиләләргә алар түләгән НДФЛның бер өлешен кире кайтару булырга мөмкин.

Фото: правительствоРБ.