1 ноябрьдән пенсияләр арта

1 ноябрьдән Социаль фонд гражданлык авиациясенең очучы экипажларының элекке әгъзаларына һәм ташкүмер сәнәгате хезмәткәрләренә пенсиягә айлык өстәмә түләүләрне чираттагы тапкыр яңадан исәпләячәк.

Мондый өстәмә түләүләр тиешле махсус хезмәт стажын туплаган һәм түләү алу хокукы бирә торган һөнәр буенча эшләүдән туктаган гражданнарга тиеш.

Өстәмә түләү күләме елына дүрт тапкыр — 1 февральдә, 1 майда, 1 августта һәм 1 ноябрьдә яңадан карала. Исәп-хисап ясаганда махсус хезмәт стажының дәвамлылыгы, пенсионерның хезмәт хакы һәм предприятиеләрнең Русия Социаль фондына (СФР) күчерә торган өстәмә страховка взнослары исәпкә алына.

Шуңа күрә ноябрьдә яңадан исәпләүдән соң өстәмә түләү күләме артырга да, кимергә дә мөмкин. Бу үзгәрешләр төп пенсия күләменә тәэсир итми.

Яңадан исәпләү автомат рәвештә башкарылачак. Яңартылган сумма пенсия белән бергә түләнәчәк.

Моннан тыш, ноябрь аенда октябрьдә 80 яшь тулган пенсионерлар да өстәмә түләү алачак. Бу яшькә җиткәч, картлык буенча страховка пенсиясенә билгеләнгән беркетелгән түләү ике тапкыр арта. 2026 елда өстәмә түләү аена 9584,69 сум тәшкил итә. Моннан тыш, пенсионерга карау өчен 1413,86 сум күләмендә өстәмә түләү билгеләнә.

Нәтиҗәдә, пенсия күләме ай саен 10 998,55 сумга арта.

Пенсияне арттыру туган көннән башлап билгеләнә. Октябрьдә 80 яшь тулган кешеләргә ноябрьдә арттырылган пенсия һәм туган көненнән соң үткән көннәр өчен өстәмә түләү күчереләчәк.

Гариза бирергә кирәкми — Социаль фонд пенсияне автомат рәвештә яңадан исәпләячәк.

Өстәмә түләү картлык буенча страховка пенсиясе алучыларга тиеш. Социаль пенсия яки туендыручысын югалту буенча пенсия алучыларга беркетелгән түләү ике тапкыр арттырылмый. Әгәр пенсия беренче төркем инвалидлыгы сәбәпле инде арттырылган булса, беркетелгән түләү кабат арттырылмый.

Фото: Электрогазета