+13 °С
Болытлы
Гәзиткә язылуVKOKTelegram
Барлык яңалыклар
Спорт
15 сентябрь 2016, 02:00

Башкортстан – көрәшчеләр төбәге

Уфага өч тапкыр Олимпия чемпионы Александр Карелин килде.Үткән атнада Уфаның “Динамо” стадионында В. А. Борман истәлегенә грек-рим көрәше буенча XXXI Бөтенрусия турниры үтте. Бәйгедә ил төбәкләреннән, БДБ илләреннән 200гә якын спортчы катнашты.

Шушы уңайдан башкалабызга дәрә­җәле кунаклар, шул исәптән, грек-рим көрәше буенча өч тапкыр Олимпия чемпионы Александр Карелин, килде. Спорт легендасы, башка чараларда да актив катнашудан тыш, “Спорт көрәшен – мәктәпләргә” программасы гамәлгә ашырылучы Уфаның 127нче мәктәбе укучылары белән очрашты.

– Башкортстан көрәшнең барлык төрләре дә югары дәрәҗәдә үсеш алган ил төбәкләренең берсе санала, – диде ул очрашу вакытында. – Уфага Советлар Союзы чорында да ярышларга килгәнем булды. Биредә бүген дә илкүләм бәйгеләрнең югары дәрәҗәдә үтүе күп нәрсә турында сөйли. Русиянең 19 төбәгендә, шул исәптән Башкорстанда, “Спорт көрәшен – мәктәпләргә” программасы гамәлгә ашырыла. Программа кысасында Уфаның 127нче мәктәбендә физкультура дә­ресендә балалар спорт көрәше белән шөгыльләнә. Тренер – Русиянең спорт мастеры Артур Рәхмәтуллин. Гомумән, күр­гәннәрдән канәгатьмен. Башкортстан – көрәшчеләр төбәге. Биредә киләчәктә дә чемпионнар тәрбияләү өчен бөтен шартлар да тудырылган.

Александр Карелин грек-рим, ирекле һәм милли көрәш белән шөгыльләнүче яшь спортчы­ларның күрсәтмә чыгышларын карады. Арытаба оештырылган очрашуда мәктәпнең актлар залында тормышы турында, спортка килү тарихын сөйләде һәм бала­ларның сорауларына җавап бирде. Очрашудан соң абруйлы кунак, һәр сыйныф белән фотога төшеп, автографлар өләште.

“Спорт көрәшен – мәк­тәпләргә” программасын ки­ләчәктә Баш­кортстанның тагын берничә мәктәбендә гамәлгә ашыру планлаштырыла. Спорт түгәрәкләренә йөрүче балалар, гадәттә, укуда да сынатмый. Өстәвенә, танылган спортчылар белән очрашу мөмкинлеге дә арта. Шуңа күрә мондый мөмкинлеккә ия булырга омтылучы “белем учаклары” арасында көндәшлек зур булыр дип көтелә.
Читайте нас: