Туган ягы батыр улын онытмый

Илеш районы — илгә ике Советлар Союзы Героен — Муса Гәрәевны һәм Әнвәр Абдуллинны биргән төбәк. Әнвәр Абдулла улы бу мәртәбәле исемгә — бер, ә Муса Гайса улы ике тапкыр лаек булган. Районда илгә танылулы Бөек Ватан сугышы батырларын онытмыйлар, аларның исемнә­рен мәңгеләштерү җәһәтен-нән гаять зур эш алып баралар.
Өч ел элек илешлеләр бик матур башлангычка —Советлар Союзы Герое Әнвәр Абдуллинның якты истәлегенә багышланган йөзү буенча ярышка старт бирде. Ул Бөек Җиңү бәй-рәме алдыннан үткәрелә, анда катнашучылар саны елдан-ел арта. Быел да әлеге турнир зур оешканлык белән үтте. Анда Илеш, Дүртөйле, Татарстанның Актаныш, Мөслим районнарыннан 100дән артык яшь йөзүче катнашты.
Йөзү буенча ярышлар белән беррәттән, армреслинг буенча да бәйге оештырылды. Анысында район үзәгенең 1нче һәм 2нче Балалар-яшүсмерләр спорт мәктәпләрендә шөгыль­ләнүче яшь спортчылар көч сынашты.
Чарага, һәр елдагыча, Геройның уллары Марат һәм Наил әфәнделәр кил­гән иде. Башта мәртәбәле кунаклар 2нче Балалар һәм яшүсмерләр спорт мәктә­бенең фойесында урнаштырылган, Әнвәр Абдуллинга багышланган күргәзмәне, шул тематикага төшерелгән рәсемнәрне карады, арытаба армреслинг ярышларына, аннары йөзү буенча бәйгегә старт бирелде.
— Безнең Балалар һәм яшүсмерләр спорт мәктәбе­нең йөзү һәм армреслинг секциясендә шөгыльләнүче балалар район күләмендә генә түгел, республика, тө-бә­кара дәрәҗәдә узган ярыш­ларда да матур гына уңышлар яулый. Бүген дә алар сынатмас, Геройның исемен мәңгеләштерүгә үз өлешләрен кертер, киләчәк-тә әлеге мәртәбәле ярышларда катнашучыларның саны тагын да күбрәк булыр, чарабызга илнең төр­ле төбәкләреннән яшь йөзү­челәр килер, дип ышанып калам, — дип белдерде, чараны ачып, 2нче Балалар-яшүсмерләр спорт мәк­тәбе директоры Рөстәм Сәетов.
Чара барышында Илеш районы хакимияте башлы­гының социаль мәсьәләләр буенча урынбасары Рамил Хәйретдинов, район хаки­мия­тенең Спорт, туризм һәм яшьләр сәясәте буенча комитеты рәисе Иршат Фәсхиев, район Ветераннар советы рәисе Анатолий Романов, Бөек Ватан сугышы ветераны Хәнәфи Шаһа­бетдинов, Дөмәй урта мәк­тәбе директоры Әхсән Насыйбуллин яшь спортчыларга үзләренең матур те­ләкләрен җиткерделәр. Арытаба сүзне Әнвәр Аб­дул­линның улы Марат алды.
— Бүген мин аеруча нык дулкынланам. Бөек Ватан сугышы чорында каһар­манлык күрсәткән әтие­безне онытмаулары, олылавы өчен район хаки­мия­тенә, Дөмәй урта мәктәбе коллективына, йөзү буенча ярышны оештыручыларга, бигрәк тә 2нче Балалар-яшүсмерләр спорт мәктәбе директоры Рөстәм Сәетовка барыбыз исеменнән дә зур рәхмәтемне белдерәм! —диде Марат Әнвәр улы.
Наил Әнвәр улы да катнашучыларга иң изге теләкләрен җиткерде.
Яшь спортчылар биш сәгать дәвамында көч сынашты. Иң-иңнәргә Мактау кәгазьләре һәм медальләр тапшырылды. Шунысы игътибарга лаек: Геройның уллары эшләтеп алып килгән Кубокның икесе дә 2нче спорт мәктәбендә калды.
Чара күңелдә тик матур тәэссоратлар калдырды. Бе­рен­чедән, балаларның спорт­ны үз итүе сөендерсә, икенчедән, районда биредә туып-үскән геройларның исемен мәңгеләштерү җә­һә­теннән зур эш алып барылуы күңелне куандырды. Үткәнен белмәгән халыкның киләчәге юк, диләр. Илеш­леләр дә моны яхшы аң­лый. Шуңа да батыр улла­рының исемнәрен мәңге­ләштерү җәһәтеннән кулларыннан килгәннең барысын да эшләргә тырыша.