+21 °С
Болытлы
Спорт
29 август 2019, 04:10
Олимпия уеннарына юллама оттык!
Республиканың профессиональ клублары алдына җитди максатлар куелды
Республиканың профессиональ клублары алдына җитди максатлар куелды
Соңгы елларда республикада спорт шактый зур үсеш алды. Күптән түгел генә “Уфа” футбол клубы Европа лигасында чыгыш ясады, “Урал” волейбол клубы Русия лигасында алдынгы урыннар өчен көрәш алып бара. Ә берничә ел элек барлыкка килгән “Уфимец” баскетбол клубы илнең алдынгы лигасына чыгарга омтыла. “Салават Юлаев” хоккей командасы, гадәттәгечә, алдынгы урыннар өчен көрәшә.
“Уфа” футбол командасы өчен яңа сезон башланды да инде. Гадәттәгечә, узган сезонда яхшы уен күрсәткән спортчылар Русиянең алдынгы командаларына күчте. Клубның генеральный директоры Шамил Газизов әйтүенчә, команда уенчыларны саткан акчага яши дә инде. Гомумән алганда, Русия премьер-лигасында иң аз бюджет безнең командада. Ул елдан-ел яшәрә, оста уенчыларыбыз китә, әмма нәтиҗәбез һәрчак бар. Белгечләр билгеләвенчә, клуб җитәкчелегенең дөрес трансферлар сәясәтен алып баруы командага яхшы нәтиҗә күрсәтергә мөмкинлек бирә. Әлбәттә, команданың баш тренеры Вадим Евсеевны билгеләп үтәргә кирәк. Узган елда ул клубка сезон уртасында килде. Ул вакытта безнекеләр азаккы урында бара иде. Нәтиҗәдә, без 13нче урынны алып, илнең иң алдынгы лигасында калдык.
Агымдагы сезонда безнекеләр яхшы уен күрсәтә. Аерым алганда, җанатарларны команданың күп гол кертүе сөендерә. Шулай булгач, җиңүләр булачак дигән сүз. Командада үзебез үстергән футболчылар булуы шатлыклы. Агымдагы елда “Уфа-2” командасыннан яшь уенчылар Данила Емельянов һәм Алексей Чернов кушылды. Әйтергә кирәк, алар Русия премьер-лигасында үз көчләрен сынап карады. Вадим Евсеев билгеләвенчә, арытаба алар үзләрен күрсәтергә тиеш.
“Урал” волейбол клубы өчен яңа сезон 13 октябрьдә генә старт алса да, алар әзерлекне бүгеннән башлады. Агымдагы елда командабызда үзгәрешләр булды. Күп еллар буе безнең команданың данын яклаган алдынгы уенчыбыз, Русия җыелма командасы вәкиле Дмитрий Ковалев Санкт-Петербургның “Зенит” командасына күчте. Бу очракта акча мәсьәләсе күп роль уйнагандыр. Без “Газпром” җәмгыяте командасы белән бу яклап ярыша алмыйбыз.
Ә җанатарларны сөендергән хәбәр июнь аенда килде. Безнең командага Алексей Спиридонов кайтты. Элегрәк ул “Урал”ның данын яклаган иде. Шул вакыттан җанатарлар аны бик яратты, үз итте. Гомумән, белгечләр әйтүенчә, бездә көчле команда җыелды. “Урал” ЕКB кубогында катнашырга ниятли. Моның өчен Русия лигасында ким дигәндә 5нче урынны алырга кирәк. Ә мәгълүм булуынча, Русиядә дөньяның иң көчле уенчылары эшли. Һәм бу максатка ирешергә безнең командага бик авыр булачак.
“Уфимец” баскетбол клубы яңа сезонга әзерлекне июльдә башлады. Әлеге вакытта команда тренерлары яңа уенчыларны сайлый. “Уфимец”ка эләгер өчен Саратов, Ырынбур, Казан һәм башка шәһәрләрдән спортчылар килгән. Әлбәттә, аларның иң яхшылары гына безнең командада калачак.
Әлбәттә, республикабызда, профессиональ клублардан тыш, шәхси спортчыларыбыз да бар. Биатлончылар Эдуард Латыйпов һәм Антон Бабиков, җәен чаңгыларны роликларга алыштырып, төрле дәрәҗәдәге ярышларда көч сынаша.
Спортчыларыбызга һәм командаларыбызга җиңүләр генә телибез!
Ример НАСРЕТДИНОВ.
