Уфада зур спорт фестивале уза

Чарада Башкортстан Хөкүмәте Премьер-министры урынбасары Ирек Сәгыйтов, Бәйсез Дәүләтләр Берлегендә катнашучы дәүләтләрнең гуманитар хезмәттәшлеге дәүләтара фонды җитәкчесе киңәшчесе Камол Рәхимов, Башкортстан Республикасының спорт министры Руслан Хәбибов, Россконгресс спорт платформасының "РК Спорт" генеральный директоры Сергей Москвитин, Бөтенрусия Мәктәп спорты федерациясе башкарма директоры урынбасары Борис Сосков һәм башка дәрәҗәле кунаклар катнашты.

- Әлеге фестиваль республикада беренче тапкыр үткәрелә. Без үзебездә кунаклар кабул итүгә бик шатбыз. Биредә - Бәйсез Дәүләтләр Берлеге илләреннән 400дән артык катнашучы. Бүген спорт - тугандаш илләрдән һәм Русия төбәкләреннән килгән балалар өчен мөһим берләштерү көче. Фестиваль республикада мәктәп спортын үстерүгә этәргеч бирер, дип ышанам. Уфа һәм Башкортстанны яхшы яктан гына истә калдыру өчен без кулдан килгәннең барысын да эшләрбез. Катнашучыларга спорт бүләкләрен генә түгел, танышулар һәм дуслар дә алып кайтуларын да телим, - диде Ирек Сәгыйтов.

Милли костюмнарда делегацияләр парады, фестивальнең флагын күтәрү, шулай ук иҗади коллективлар чыгышы - болар барысы да тамашачылар һәм катнашучылар спорт бәйрәме ачылышында булды.

Фестивальдә Бәйсез Дәүләтләр Берлеге илләре һәм башка дәүләтләр җыелма командалары составында 400дән артык спортчы катнаша: Әзербайҗан, Кыргызстан, Әрмәнстан, Беларусь, Казахстан, Молдова, Таҗикстан һәм Үзбәкстан республикалары, шулай ук Русия Федерациясе (Мәскәү өлкәсе, Башкортстан Республикасы (шул исәптән Уфа шәһәре), Татарстан Республикасы, Свердловск өлкәсе, Кырым Республикасы, Пермь крае, Ленинград өлкәсе, Мәскәү шәһәре).

Республиканың спорт министры Руслан Хәбибов мәктәп укучылары ярышлары белән параллель рәвештә бай мәдәни-белем бирү программасы көтә, дип сөйләде. Фестивальдә катнашучылар Уфа "Нур" татар дәүләт театрында булачак, "Салават Юлаев" һәм "Сочи" хоккей клубы командалары арасындагы хоккей матчында караячак.

Фото: pravitelstvorb.ru